रास्वपाले किन गर्यो भैरहवा र पोखराको चुनावी सभा स्थगित !

काठमाडौं । राष्ट्रिय स्वतन्त्र पार्टी (रास्वपा)ले भैरहवा र पोखरामा आयोजना गर्न लागिएका चुनावी सभा स्थगित गरेको छ । पार्टीकी सहप्रवक्ता प्रतिभा रावलले दिएको जानकारीअनुसार फागुन ९ गते भैरहवा र फागुन १० गते पोखरामा तय गरिएका चुनावी सभा हालका लागि स्थगित गरिएको हो ।

उक्त सभाहरूमा पार्टी सभापति रवि लामिछाने र वरिष्ठ नेता बालेन्द्र साहले सम्बोधन गर्ने कार्यक्रम तय गरिएको थियो । तर विशेष कारणले ती सभा स्थगित गरिएको रावलले जानकारी दिएकी छन् । यद्यपि सभा स्थगित गर्नुको कारण भने सार्वजनिक गरिएको छैन ।

यसअघि पार्टीले बुधबार र बिहीबार धनगढी र वीरेन्द्रनगरमा चुनावी सभा सम्पन्न गरिसकेको  । सुर्खेतको सभामा सहभागी भएपछि वरिष्ठ नेता साह स्वास्थ्य समस्याका कारण काठमाडौं फर्किएका छन् ।

यसैबीच सभापति लामिछाने भने सुर्खेतबाट बाँके हुँदै दाङतर्फ चुनावी अभियानमा सक्रिय छन् । उनी बिहीबार राति तुलसीपुर पुगेका थिए ।

तुलसीपुरमा लामिछानेको स्वागतका क्रममा पार्टीका केही कार्यकर्ताले एमालेको झण्डा जलाएको घटना सार्वजनिक भएपछि त्यहाँ राजनीतिक तनावको अवस्था सिर्जना भएको छ । उक्त घटनापछि विभिन्न राजनीतिक दल र समूहहरूले आपत्ति जनाउँदै घटनाबारे चासो व्यक्त गरेका छन् ।

पार्टीले आगामी कार्यक्रमहरूबारे भने चाँडै नयाँ तालिका सार्वजनिक गर्ने जनाएको छ ।