कपिलवस्तु । कपिलवस्तु नगरपालिका-९ ले वडा कार्यालय मै माटो परीक्षण सुविधा दिन सुरू गरेको छ। वडाका किसानलाई सहज होस भनेर कार्यालयले यसै सातादेखि माटो परीक्षण सुरु गरेको हो ।
वडा कार्यालयलाई मुक्तिनाथ एग्रो प्रा.लिबाट डिजिटल माटो परीक्षण मिनी ल्याब उपलब्ध गराएपछि किसानले आवश्यक परेको बेला माटो परीक्षण गर्न सक्ने भएका छन् । वडा कार्यालयले निःशुल्क रूपमा माटो परीक्षण गर्ने वडा अध्यक्ष शिव वाग्लेले बताए ।
पहिलो चरणअन्तर्गत वडाले ५० हजार लागतमा ५० थान किट खरिद गरी एक सातासम्म परीक्षण अभियान सुरु गरेको वडा सचिव विजय पोख्रेलले बताए । वडामै माटो परीक्षण सेवा सुरु भए पछि कृषकहरू आउने क्रम जारी रहेको बताइएको छ ।
मिनी ल्याबको प्रयोगबाट माटोको पिएच लेभल [अम्लियपन], माटोमा मलको मात्रा, नाइट्रोजन, फस्फोरस, पोटास तथा माइक्रो न्युट्रेन्ट [सल्फर, जिङ्क, म्याग्नेसियम, आइरन] परीक्षण गर्न सकिने नायब पशु स्वास्थ्य प्राविधिक विपिन पोख्रेलले बताए । परीक्षणपछि किसानलाई माटो अनुसारको बाली लगाउन समेत सिफारिस गरिने बताइएको छ ।
प्रतिक्रिया