बुटवल । भैरहवामा सम्पन्न प्रो–क्लब च्याम्पियनसीप क्रिकेटको उपाधि रुपन्देही –११ टिमले चुमेको छ । शनिबार भएको फाईनल खेलमा मलेसिया–११ लाई सात विकेटले पराजित गर्दै रुपन्देही–११ ले उपाधि चुमेको हो । उपाधिसंग रुपन्देही नगद २ लाख ५० हजार रुपैया, कप, प्रमाणपत्रबाट पुरस्कृत भएको छ भने उपविजेता मलेसिया नगद १ लाख, कप, प्रमाणपत्रमा चित्त बुझाएको छ ।
सिद्धार्थनगर क्रिकेट रंगशालामा भएको फाइनल खेलमा टस हारेर ब्याटिङको निम्तो पाएको मलेसिया–११ का ब्याट्सम्यानहरुले २० ओभरमा खेल्दै ६ विकेटको नोक्सानीमा १ सय ४० रनको योगफल तयार पारेका थिए । मलेसियाको नर्जरिल रहमानले ३६ तथा जुबैदी जुलफुक्लेले २६ रनबाहेक अन्य ब्याट्सम्यानले दोहोरो अंक जोड्न सकेनन । रुपन्देहीका बसिर अहम्मदले ३२ रन खर्चेर दुई तथा विक्रम भुसाल, बिशालबिक्रम केसी, कप्तान कृष्ण कार्की र रुपेश कुर्मीले एक–एक विकेट लिएका थिए । मध्यम लक्ष्य रुपन्देहीले १९ ओभरमा तीन विकेटको नोक्सानीमा पूरा गर्यो । रुपन्देहीको जितमा प्रज्वल थापाले सर्वाधिक ७१ रनको योगदान दिए । यस्तै सन्दिप रजाइली ४१ रनको योगदान दिएका थिए । मलेसियाको लागि शाहिद अजिज, मुहम्मद वकिफ र शार्भिन मुनियान्डीले एक एक विकेट लिए ।
फाईनल खेलमा रुपन्देही ११ का प्रज्वल थापा म्यान अफ द म्याचबाट पुरस्कृत भए । प्रतियोगितामा रुपन्देही ११ का बसिर अहमद प्लेयर अफ द सिरिजबाट पुरस्कृत भए ।
चैत २५ देखि वैशाख ३ गतेसम्म नेपालमा पहिलोपटक आयोजना गरिएको टी–२० क्लब क्रिकेट प्रतियोगितामा नेपालका चार, भारतका दुई, मलेसिया र बंगलादेशका १–१ क्लब सहभागी थिए ।
प्रतिक्रिया