दुई दिने सार्वजनिक बिदा आजदेखि खारेज

काठमाडौं । सरकारले सातामा दुई दिन दिँदै आएको सार्वजनिक बिदा आज देखि खारेज भएको छ ।

जेठ १ गतेदेखि लागू गरिएको सातामा शनिबार र आइतबार सार्वजनिक बिदा दिने निर्णय आज असार १ गते देखि खारेज भएको हो ।

जेठ २३ गते बसेको मन्त्रिपरिषद् बैठकले बिदा खारेज गर्ने निर्णय गरेको थियो । जसअनुसार अब सातामा आइतबार हुँदै आएको सार्वजनिक बिदा कटौती भएको छ ।

सम्भावित आर्थिक संकटको जोखिम रोक्न खर्च कटौती गर्न भन्दै सरकारले परीक्षणका लागि शनिबार र आइतबार दुई दिन सार्वजनिक बिदा दिने निर्णय १३ वैशाखको मन्त्रिपरिषद् बैठकबाट गरेको थियो । जसको चर्को आलोचना भएको थियो । त्यसपछि सरकार आफ्नो निर्णयबाट पछि हट्न बाध्य भएको हो ।

दुई दिन सार्वजनिक बिदा दिने भएपछि कार्यालयमा समय बिहान ९:३० बजेदेखि साँझ ५:३० बजेसम्म कायम गरिएको थियो । अब कार्यालय समय पनि यसअघिकै अर्थात् बिहान १० बजेदेखि साँझ ५ बजेसम्मको हुनेछ ।