लुम्बिनीको दानपात्रमा २२ लाख बढी रकम

बुटवल । गौतमबुद्धको जन्मस्थल लुम्बिनीमा ३ महिनाको अवधिमा २२ लाख बढी दान संकलन भएको छ । लुम्बिीनीका मुख्य मुख्य स्थानमा राखिएको ३ वटा दानपात्रबाट २२ लाख रुपैंया बढी नगद दान संकलन भएको हो ।

लुम्बिनी स्थित मायाँदेवी मन्दिरमा राखिएको दानपात्रमा ३ महिनाको अवधिमा २२ लाख ९७ हजार रुपैंया संकलन भएको लुम्बिनी बिकास कोषका कोषाध्यक्ष ढुण्डिराज (सिद्धिचरण) भट्टराईले जानकारी दिए ।

लुम्बिनी बिकास कोषले गत आईतबारदेखि दानपात्रको रकम गणना सुरु गरेको थियो । कोषको निर्णयमा १५।१५ दिनमा दानपत्र खोल्ने भनिएपनि दानपत्र भरिएपछिमात्र खोल्ने समझदारी अनुसार ३ महिनापछि दानपत्र भरिएको र त्यसपछि खोलिएको कोषध्यक्ष भट्टराईले बताए ।

दानपात्रमा रहेको रकम गणनालाई पारदर्शी बनाउन सीसीटिभीको निगरानी सहित सुरक्षाको पर्याप्त व्यवस्था गरिएको थियो ।

कोषाध्यक्ष भट्टराईले कोरोना महामारी पछि लुम्बिनीमा विदेशी पर्यटक कम आएकाले दानपेटिकामा भेटी कम आएको बताए । अघिल्लो वर्ष चैतको १८ गते दानपेटिका खोलिएको थियो यो वर्ष असारको १९ गते खोलिएको हो । कोषले दानपात्रमा संकलित उक्त रकमबाट करारका कर्मचारीलाई तलव लगायत अन्य व्यवस्थापनको काम गर्दै आएको छ ।