परोर्हा धामलाई डाउनटाउनको आर्थिक सहयोग

बुटवल । पश्चिमको पशुपतिको रुपमा पहिचान बनाएको स्वयंम उत्पत्तिमान परोर्हा परमेश्वर धाम मन्दिरमा साउन मेलाको भण्डाराका लागि रोटरी क्लब अफ बुटवल डाउनटाउनसहित संघसंस्थाहरुले आर्थिक सहयोग गरेको छ । सोमबार मन्दिर परिसरमा विशेष पुजाआजासहितको कार्यक्रममा परोर्हा परमेश्वर धाम विकास समितिका अध्यक्ष राम वली चौधरी, सैनामैना वडा नं ४ का वडाअध्यक्ष राम प्रसाद अधिकारीलाई डाउनटाउनका क्लबका अध्यक्ष भरत रानाले एघार हजार एक सय एघार रुपैया रकम हस्तान्तरण गरेको हुन ।

कार्यक्रममा परोर्हा परमेश्वर बोलबम धाम विकास समितिका अध्यक्ष राम वली चौधरीले सामाजिक संघसस्थाहरुबाट भएको सहयोगका कारण मन्दिर ब्यवस्थापनमा सहज भएको बताए । कोभिडका कारण दुई वर्ष स्वदेश तथा विदेशका धार्मिक पर्यटक आउन नसकेको धाममा यसवर्ष भने घुइचो लागेको उनले बताए ।

कार्यक्रममा क्लबका अध्यक्ष भरत रानाले धार्मिक पर्यटकको घुइँचो लाग्ने साउन महिनाभरि नै मन्दिरको ब्यवस्थापनमा थोरै भएपनि आफुहरुबाट सहयोग जुटाउनु सौभाग्य भएको बताए ।

कार्यक्रममा क्लबका पूर्व अध्यक्ष राजेन्द्र ढकाल, पूर्व अध्यक्ष विमलराज भट्टराई, सचिव विष्णु भण्डारी, सहयोगी संस्थाहरु रोट्याक्ट क्लब अफ बुटवल डाउनटाउनका सौरभ भुषाल, बुटवल रामापिथेकसका विष्णु घिमिरे, बुटवल सिनर्जीका अर्जुन पौडेल, ईन्नरह्विल क्लब अफ रुपन्देहीका गिता शर्माले आगामी दिनहरुमा समेत मन्दिरमा सहयोग गर्ने प्रतिवद्धता जनाए ।