धनगढी । नेपालमा डेंगु ज्वरोबाट दोस्रो व्यक्तिको मृत्यु भएको छ । आज कैलालीमा डेंगुका कारण एक जनाको मृत्यु भएसँगै डेंगु ज्वरोबाट दोस्रो व्यक्तिको मृत्यु भएको हो । आज मृत्यु हुनेमा धनगढी उपमहानगरपालिका वडा नम्बर १२ की ३५ वर्षीय गिता शाहीको रहेकीछन् । अघिल्लो सातामात्र रुपन्देहीको बुटवलमा एक पुरुषयको डेंगुका कारण मृत्यु भएको थियो ।
निसर्ग अस्पतालमा उपचाररत कार्डियोप्लमोनरी अरेष्टबाट मृतक शाहीमा डेंगुको पनि लक्षण देखिएको थियो । उनको मंगलबार बिहान अस्पतालमा उपचारकै क्रममा मृत्यु भए पनि बुधबारमात्र पुष्टि भएको स्वास्थ्य कार्यालय कैलालीका प्रमुख लालबहादुर धामीले बताए ।
साउन महिनायता कैलालीसहित देशभरका ७० जिल्लामा डेंगुका बिरामी फेला परेका छन् । चालु आर्थिक वर्षमा डेंगुका कारण मृत्यु हुने शाही दोस्रो व्यक्ति हुन् ।
यस वर्ष हालसम्म नेपालमा दुई हजार पाँच सय ३९ जनामा डेंगु पुष्टि भएको छ ।
जिल्ला स्वास्थ्य कार्यालय कैलालीका अनुसार साउन १ गते यता कैलालीको लम्की चुहा नगरपालिकामा मात्र २५ जनामा डेंगुको संक्रमण देखिएको छ । गत वर्ष पनि कैलालीको लम्की चुहामा एक सय ३३ जना डेंगुका बिरामी देखा परेका थिए । खासगरी असारदेखि असोजसम्म डेंगुका बिरामी देखिने गरेको स्वास्थ्य कार्यालय प्रमुख धामीले बताए ।
डेंगुको संक्रमण बढ्दै गएपछि कैलालीका १३ वटै स्थानीय तहलाई सचेत रहन र संक्रमण रोक्न अभियान सञ्चालनका लागि पत्राचार गरिएको स्वास्थ्य कार्यालयले जनाएको छ । ‘परीक्षण गर्न किट महँगो छ, हामीसँग किटको अभाव भएकाले परीक्षणको दायरा बढाउन सकेका छैनौँ, माथिल्लो निकायमा पत्राचार गरेका छौँ ।’ धामीले भने ।
प्रतिक्रिया