संविधानको संरक्षकबाटै संविधानको संरक्षण र पालना हुननसक्नु दु:खद : उपराष्ट्रपति पुन

काठमाडौं । उपराष्ट्रपति नन्दबहादुर पुनले संविधानको प्रमुख पालक र संरक्षकलाई संविधानको दायराभन्दा बाहिर जाने छुट नभएको बताएका छन् ।

उपराष्ट्रपति पुनले बुधबार एक विज्ञप्ति प्रकाशित गर्दै संविधानको पालन र संरक्षणको जिम्मेवारीमा रहेकाहरूलाई संविधानको दायराभन्दा बाहिर जाने छुट नभएको बताएका हुन् । पुनले संविधानको पालना गर्नु प्रत्येक व्यक्तिको कर्तव्य भएको जिकिर गर्दै संविधानको प्रमुख सरक्षक र पालकबाट सचेतनापूर्वक संविधानको पालन र संरक्षण हुन नसकेकोमा दुःख समेत व्यक्त गरेका छन् ।

पुनले भनेका छन्, ‘संविधानको पालना गर्नु प्रत्येक व्यक्तिको कर्तव्य हो । संविधानबमोजिम सबैबाट आ–आफ्नो कर्तव्य पालना गर्नुका साथै संविधानको पालना र संरक्षण हुनुपर्दछ।’

‘पछिल्ला दिनमा विकसित घटनाक्रमले संविधानको प्रमुख पालक र संरक्षकबाट नै सचेततापूर्वक संविधानको पालन र संरक्षण हुन नसकेको भनी वृहत् जनआवाज उठिरहेको छ । यो आवाज उठ्ने परिस्थितिको सिर्जना हुनु ज्यादै दुःखद पक्ष हो ।’ पुनले विज्ञप्तिमा उल्लेख गरेकाछन् ।

उपराष्ट्रपति पुनले संविधान दिवसमा गरेको प्रतिवद्धतालाई स्मरण गर्दै संविधानको पालना र संरक्षणका लागि सबै पक्षलाई आग्रह गरेका छन् ।