बाँके-१ : राष्ट्रिय खेलकुद सकेर खेलकुद मन्त्री पुगे मतदाताको घरआँगनमा, विकास नै मुख्य एजेण्डा

कोहलपुर । नेपाल सरकारका युवा तथा खेलकुद मन्त्री महेश्वर गहतराज (अथक) यतिबेला आफ्नो गृहजिल्लामा छन् । लामो समयदेखी रोकिएको राष्ट्रिय खेलकुद प्रतियोगिता ऐतिहासिक रुपमा सम्पन्न गराए लगत्तै उनि गृहजिल्ला बाँके पुगेका हुन । आसन्न निर्वाचनमा बाँके क्षेत्र नं. १ बाट प्रतिनिधी सभा पदका उम्मेदवार समेत रहेका मन्त्री गहतराज यतिबेला चुनावी मैदानमा होमिएका छन ।

०७४ सालमा बाँके क्षेत्र नं. १ बाट प्रतिनिधि सभा साँसदका रुपमा निर्वाचित भएका मन्त्री अथक पुनः सोही निर्वाचन क्षेत्रबाट उम्मेदवार बनेका छन । भौगोलिक र जनसँख्याको हिसावले जिल्लाकै सबैभन्दा ठुलो निर्वाचन क्षेत्रको प्रतिनिधित्व गर्दै आएका अथक दोस्रो पटक साँसदका रुपमा दोहोरीने प्रयासमा जुटेका छन् ।

कोहलपुर नगरपालिका वडा नं. ५ स्थित भाडाको घरमा बस्दै आएका उनी प्राय स्थानियको घरआँगनमा भेटिन्छन् । सामान्य रुपमा चुनावी गतिविधि गरीरहेका अथकले चुनावी सभालाई भन्दा बढि ब्यक्तिगत भेटघाटलाई महत्व दिदैै आएका छन् । पाँच दलिय गठबन्धनबाट साझा उम्मेदवार बनेका उनलाई नेपाली काँग्रेस, नेकपा (माओवादी केन्द्र), नेकपा (एकिकृत समाजवादी) र राष्ट्रिय जनमोर्चाले समर्थन रहेको छ ।

तीन वटा पालिका (कोहलपुर, राप्तीसोनारी र नरैनापुर) मिलेर बनेको बाँके निर्वाचन क्षेत्र नं. १ मा १ लाख २१ हजार १०० मतदाता रहेका छन । उक्त निर्वाचन क्षेत्र भौगोलिक दृष्टिकोणले देशकै ठुलो निर्वाचन क्षेत्र मध्येको एक हो ।

अघिल्लो पाँच वर्षे कार्यकालमा उक्त निर्वाचन क्षेत्रमा भए गरेका विकासका काम र आगामी दिनमा गर्नुपर्ने कामको बारेमा मतदाताहरुसँग छलफल गर्ने क्रममा मन्त्री गहतराजले विकास नै आफ्नो सबैभन्दा ठुलो एजेण्डा रहेको बताउने गरेका छन ।

आफ्नो पाँच वर्षे कार्यकालमा क्षेत्र नम्बर १ को विकास गर्दा पक्षपात नगरेर काम गरेको उनको दाबी छ । “क्षेत्र नम्बर १ का बिद्यालयको शैक्षिक सुधार कार्यक्रमका साथै यहाँको आधारभुत आवश्यकता सडक, बिजुली, सिचाइँ, खानेपानी, पुल पुलेसा, कटान तथा डुवान नियन्त्रण गर्न उल्लेखनीय काम भएका छन” उनले भने ।

चुनाव जित्नु ठुलो कुरा नभएको बताउँदै उनले मुलुक प्रतिको ईमान्दारिता सबैभन्दा ठुलो कुरा भएकाले राष्ट्रियता र संविधानको रक्षाकालागि पाँच दलिय गठबन्धनका उम्मेदवारलाई मतदान गर्न आह्वान गरे ।

बाँके क्षेत्र नं. १ मा मन्त्री अथकसँगै प्रदेश सभा (क) मा कृष्णा केसी (नमुना) र प्रदेश सभा
(ख) मा फुलाराम थारु पाँच दलिय गठबन्धनबाट उम्मेदवार बनेका छन ।