काठमाडौं । गृहमन्त्रीमा नियुक्त गर्न प्रधानमन्त्रीलाई दिएको २ दिनको म्याद सकिनै लाग्दा राष्ट्रिय स्वतन्त्र पार्टीले केन्द्रीय समिति र संसदीय दलको आकस्मिक बैठक बोलाएको छ । शनिबार राति साढे ८ सूचना जारी गर्दै आकस्मिक बैठकका लागि बोलाइएको एक केन्द्रीय सदस्यले जानकारी दिएका छन् ।
रास्वपाले सरकार गठनका बेला भएको सहमति अनुसार गृह मन्त्रालय आफूले पाउनुपर्ने माग गर्दै गृह मन्त्रालय नपाए सरकारबाट बाहिरिने चेतावनी दिएको छ । रास्वपाका नवनियुक्त अध्यक्ष रवि लामिछानेलाई नै गृहमन्त्री नियुक्त गर्नु पर्ने अडानका विपक्षमा प्रधानमन्त्री प्रचण्ड कायम रहेपछि रास्वपाले सरकार छाड्ने चेतावनी दिएको थियो ।
यसअघि बिहीबार बसेको केन्द्रीय समिति र संसदीय दलको बैठकले माग पूरा गर्न प्रधानमन्त्रीलाई २ दिनको समय दिने निर्णय गरेको थियो । रविलाई नै गृहमन्त्रीमा पठाउनु पर्ने अध्यक्ष रविको अडानका विपक्षमा पार्टीका अन्य नेताहरुको अभिब्यक्ति आएपछि सो पार्टीले प्रधानमन्त्री र एमाले अध्यक्ष केपी ओलीले आग्रह गरेको भन्दै २ दिनलाई समय दिने जनाएको थियो ।
प्रतिक्रिया