भिटामिन ‘ए’ नखुवाई फर्काइयो बाँकेमा बालबालिकालाई, ड्यामेज क्याप्सुलको जिम्मेवारी कस्ले लिने ?

नेपालगन्ज । बाँकेमा भिटामिन ए खुवाउन स्वास्थ्य केन्द्र पुगेका बालबालिकाहरुलाई भिटामिन नखुवाई फर्काइएको छ । म्याद सकिएकै महिनाको भिटामिन ए क्याप्सुल खुवाउने तयारी गरिएकोमा क्याप्सुल ड्यामेज भेटिएपछि कार्यक्रमको अघिल्लो दिन अबेला कार्यक्रम स्थगित गरिएको थियो ।

स्थगित गरिएको सूचना सर्वसाधारणमा पुग्न नसक्दा आज बिहनै देखि अभिभावकहरु बालबालिका लिएर भिटामिन ए खुवाउन स्वास्थ्य केन्द्रहरुमा पुगेका थिए । बालकालिका लिएर आएका अभिभावकलाई म्याद सकिएको भिटामिन आएको भन्दै स्वास्थ्य स्वयंसेवीकाहरुले नखुवाई फर्काएको राप्ती सोनारीकी एक अभिभावकले बताइन् ।

२०२३ अप्रिल सम्ममात्र म्यादभएको क्याप्सुल खुवाउने तयारी गरेको स्वास्थ्य कार्यालयले वितरण गरेको क्याप्सुल रङ्ग उडेको र ड्यामेज फेला परेपछि हतार हतारमा कार्यक्रम स्थगित गरिएको थियो । स्वास्थ्य कार्यालयको ड्यामेज क्याप्सुल खुवाउने तयारीका बारेमा प्रदेश स्वास्थ्य निर्देशनालयमा सूचना पुगेपछि निर्देशनालयको निर्देशनमा कार्यक्रम स्थगित गरिएको बताइएको छ ।

स्वास्थ्य कार्यालयको लापरवाहीपूर्ण भण्डारणका कारण वितरण गरिएको भिटामिन ए को क्याप्सुलको रङ्गमा परिवर्तन आएपछि गांउमा खटिएका स्वाथ्यकर्मीले प्रदेश स्वास्थ्य निर्देशनालयमा सूचना गरेका थिए ।

बालबालिकालाई खुवाइने भिटामिन ए जस्तो संबेदनशिल क्याप्सुल नेपालगन्जको चर्को घाममा भण्डारण गरिएका कारण ड्यामेज भएको स्रोतले दाबी गरेको छ । गोदाम र निश्चित तापक्रममा राखिनुपर्ने भिटामिन क्याप्सुल केहीदिन देखि गोदाम बाहिर खुल्ला घाममा राखिएको स्रोतको दाबी छ ।

सामान्यतया म्याद सकिएको महिनाको औषधी प्रयोगमा नल्याउने परम्परा बिपरित स्वास्थ्य कार्यालयले म्याद सकिएको महिनामा भिटामिन खुवाउने तयारी गरेको एक स्वास्थ्यकर्मीले बताए ।

राज्यको लाखौ रुपैयाँ खर्च भएको भिटामिनलाई चर्को घाममा भण्डारण गरेर ड्यामेज गराउर्ने स्वास्थ्य कार्यालयका अधिकारीमाथि छानविन हुनुपर्ने एक स्वास्थ्यकर्मीले नाम नबताउने सर्तमा खबरकुरालाई बताए ।

बुधबारबाट खुवाउने तयारी गरिएको भिटामिन ए अव कहिले खुवाउने भन्ने मिति तय भएको छैन । घटना सम्बन्धमा स्वास्थ्य कार्यालय बाँकेकी प्रमुख सुनिता पौडेलले अनावश्यक हल्ला मच्चाइएको बताइन् । उनले स्वास्थ्य कार्यालयले वितरण गर्ने मात्र जिम्मेवारी लिएको बताउँदै उनले पालिकाहरुले नै कार्यक्रम संचालन गर्ने बताइन् । फरक रङ्गका क्याप्सुल भेटिएपछि कार्यक्रम स्थगित गरेर नयाँ स्टक मगाइसकिएको र आज मध्यान्ह सम्म आइपुग्ने उनले बताइन् । घाममा भण्डार णगरिउको आरोपको भने उनले खण्डन गरिन् । नेपालगन्जको तापक्रमले भए भन्न सकिन्न, तर भण्डारण मापदण्ड अनुसार नै गरिएको छ, उनले भनिन्, तपाईहरु आएर हेर्न सक्नुहुन्छ ।