सियारीमा गोली चल्यो, एकजना सामान्य घाइते

बुटवल । रुपन्देहीको सियारी-३ भैसाखादरमा एकथान मोबाइलका लागि गोली प्रहार गरेका छन् । गोली प्रहारबाट स्थानीय एक युवा घाइते भएका छन ।

बाख्रा चराउन तिनाउ नदीको कौवा घाट नजिकै गएका २६ वर्षिय विरेन्द्र केवटलाई ३ जनाको समुहमा आएको लुटेराहरुले मोबाइल माग्दै गोली चलाएका थिए । केवटमाथि गोली प्रहार गर्दै ती लुटेराहरुले मोबाइल लुटेर लगेका छन् । गोली प्रहारबाट केवत सामान्य घाइते भएका छन् ।

तिनाउ खोला नजिकै कौवा घाटमा बाख्रा चराउदै गरेका केवटसँग लुटेरा समुहले मोबाइल मागेको र मोबाइल दिन आनाकानी गरेपनि गोली प्रहार गरि मोबाइल लिएर भागेको केवटले बताए । नदी किनारमा मोटरसाइकल रोकेर केवट नजिक पुगेका लुटेरा समुहले सुरुमा मोबाइल र भएको सामान मागेको र दिन आनाकानी गरेपछि गोली प्रहार गरेको उनले बताए ।

केवटको भिम अस्पतालमा उपचार भईरहेको छ । अस्पतालका अनुसार गोली केवटको तिघ्राको लागेको छ । तिघ्रामा छिर्न नपाएकाले अवस्था सामान्य रहेको अस्पतालले जनाएको छ ।

रुपन्देही प्रहरी प्रवक्ता प्रहरी नायब उपरिक्षक श्यामू अर्यालले भने घटनास्थलमा गोली चलेको कुनै संकेत नभेटिएको बताए । ‘बन्दुकका खोका वा बारुदको कुनै संकेत घटनास्थलमा भेटिएन ।’ उनले भने ।

घाइतेले गोली प्रहार भएको बताएका आधारमा प्रहरीले अनुसन्धान थालेको डीएसपी अर्यालले बताए ।