नेपालगन्ज । नेपालगन्जका कतिपय स्वास्थ्य प्रयोगशालाहरुले अस्पतालजन्य संक्रमित फोहोर सडकमा फाल्ने गरेको फेला परेको छ । प्रयोगशालाहरुले नेपालगन्जको सुर्खेतरोडमा अस्पतालजन्य संक्रमित फोहोर फालिएको भेटिएको हो ।
निर्मूलीकरण गरेर फाल्नु पर्ने फोहोर सडकमा फालिएको भटिएपछि नेपालगन्ज उपमहानगरपालिकाले त्यसविरुद्ध अनुसन्धान सुरु गरेको छ । सुर्खेतरोडको सडकमा फालिएको फोहोरलाई उठाएर उपमहानगरपालिकाले कार्यालयमा ल्याएको छ भने फोहोर फाल्नेको खोजी अभियान थालेको उपमहानगरपालिकाले जनाएको छ । फोहोर कुनै ल्याबको नै भएको ठहर गर्दै सडकमा फोहोर फाल्ने ल्यावको खोजी सुरु गरिएको उपमहानगरपालिकाका स्वास्थ्य महाशाखाका जनस्वास्थ्य निरीक्षक जागेश्वर बस्नेतले बताए । उनका अनुसार रगत संकलन गरिएको ट्युबमा विरामीको नाम र उमेर लेखिएको छ । कुनै ट्युब खुल्ला छ भने कुनै बन्द रहेको छ ।
अस्पतालजन्य यस्ता संक्रमित फोहोरलाई उपमहानगरपालिकाको समन्वयमा केही महिनादेखि हिरमिनियामा रहेको ल्याण्डफिल साइटको एकीकृत फोहोर मैला व्यवस्थापन केन्द्रमा निर्मूलीकरण गरेर विसर्जन गर्ने गरिएको छ । अझै केही ल्याब, मेडिकल, अस्पताल उपमहानगरपालिकाको यो अभियानमा नसमेटिएको उपमहानगरको स्वास्थ्य महाशाखाले जनाएको छ ।
ल्याव र अस्पतालहरुको माग अनुसार फोहर उठाउन ट्याक्टर पठाउँदा पठाउँदै पनि सडकमा फोहर फाल्नु गलत भएको स्वास्थ्य महाशाखाका जनस्वास्थ्य निरीक्षक बस्नेतले बताए ।
नेपालगन्जमा साना ठूला अस्पताल र क्लिनिकहरु सय बढी रहेका छन् । त्यसमध्येमा ५६ वटाले मात्र उपमहानगरसँग सम्झौता गरेर अस्पतालजन्य फोहोर व्यवस्थित रुपमा विसर्जन गर्दछन् । अहिले नेपालगन्जका अस्पताल तथा क्लिनिकबाट निस्किने तीन क्वीन्टल फोहोर दैनिक ल्याण्डफिल साइटमा विसर्जन भइरहेको बस्नेतले बताए । उनका अनुसार ल्याण्डफिल साइटमा लगिने अस्पतालजन्य फोहोरलाई निर्मूलीकरण गरेर विसर्जन गर्ने गरिन्छ ।
प्रतिक्रिया