पेट्रोलमा प्रतिलिटर ११ रुपैयाँले मूल्य घट्यो, डिजलको मूल्य पनि घट्यो

काठमाडौं । नेपाल आयल निगमले पेट्रोल र डिजलको मूल्य घटाएको छ । आइतबार राति १२ बजेदेखि लागु हुने गरी निगमले पेट्रोलमा प्रतिलिटर ११ रुपैयाँ र डिजलमा लिटरमा ५ रुपैयाँले मूल्य घटाएको हो ।

भारतीय आयल कर्पोरेसन (आईओसी)बाट घटेर नयाँ मूल्य प्राप्त भएसँगै मूल्य समायोजन गरिएको निगमले जारी गरेको सूचनामा उल्लेख गरिएको छ ।

नयाँ मूल्यअनुसार काठमाडौं उपत्यकामा पेट्रोलको मूल्य प्रतिलिटर १७२ रुपैयाँमा झरेको छ भने डिजलको प्रतिलिटर मूल्य १६८ रुपैयाँ पर्नेछ । सुर्खेत र दांगमा पेट्रोलमा १७१ र डिजलमा १६७ पर्ने छ भने बिराटनगर, जनकपुर, भलवारी, नेपालगन्ज, धनगढीमा पेट्रोलको मूल्य प्रतिलिटर १६९.५० र डिजलको १६५.५० पैसा प्रतिलिटर पर्नेछ ।