नेपालगन्ज । नेपाली मौलिक संवत् नेपाल संवत ११४४ को अवसरमा नेपालगन्जमा शुभकामना आदानप्रदान सहित मोटरसाईकल र्याली निकालिएको छ । बाँकेका क्रियाशिल नेवाः खल, पुच र नेवाः गुठीहरुको संयुक्त आयोजनामा नेपालगन्जमा शुभकामना आदानप्रदान र मोटरसाइकल र्याली निकालिएको हो ।
स्थानीय गणेशमानचोकबाट सुरु भएको र्याली नेपालगन्जको बिभिन्न चोकहरु सहित प्रसिद्ध बागेश्वरी मन्दिर परिक्रमा पछि भृकुटीनगरमा पुगेर समापन भएको थियो । बाँकेका प्रमुख जिल्ला अधिकारी श्रवण कुमार पोखरेलले उदघाटन गरेर सुरु भएको र्याली नेवाः पुच बाँकेका संस्थापक अध्यक्ष बद्रि प्रसाद श्रेष्ठको प्रमुख आतिथ्यतामा समापन भएको थियो ।
र्यालीमा बाँकेबाट प्रतिनिधित्व गर्ने संघ तथा प्रदेश सांसदहरु, प्रशासन र प्रहरी प्रमुख सहित नेवाः समुदायबाट उल्लेख्य उपस्थिती रहेको थियो । नेपालगन्जको नगर परिक्रमामा क्रममा टोलटोलमा स्थानीइले र्यालीको स्वागत गरेको रुट ब्यवस्थापन संयोजक दिपेन्द्र कुमार जोशीले बताए ।
नेवाः पुच बाँकेका अध्यक्ष जितेन्द्र जोशीको अध्यक्षतामा आयोजित शुभकामना आदान प्रदान कार्यक्रममा बोल्ने वक्ताहरुले नेपाल संवत् नेवाः समुदायको मात्र नयाँ वर्ष नभएर सम्पूर्ण नेपालीहरुको भएको बताए । उनीहरुले नेपालीहरुले गौरव गर्ने एकमात्र पर्व नै नेपाल संवत् भएको दाबी गरे ।
फोटो सौजन्य : रुपक श्रेष्ठ
प्रतिक्रिया