काठमाडौं । टी-२० क्रिकेट सिरिजको अन्तिम खेलमा नेपालले वेस्ट इन्डिज ‘ए’ लाई हराएको छ । कीर्तिपुरस्थित त्रिवि अन्तर्राष्ट्रिय क्रिकेट मैदानमा शनिबार भएको खेलमा नेपालले वेस्ट इन्डिज ‘ए’ लाई ६ विकेटले पराजित गरेको हो ।
यससँगै ५ खेलको सिरिज नेपालले ३-२ ले गुमाएको छ । बिहीबार भएको खेलमा नेपाललाई पराजित गर्दै वेस्ट इन्डिज ‘ए’ को उपाधि जित्ने पक्का भएको थियो ।
वेस्ट इन्डिज ‘ए’ ले दिएको १७६ रनको लक्ष्य नेपालले १८.५ ओभरमा ४ विकेटको क्षतिमा पूरा गर्यो । नेपालका लागि अनिल साह र आसिफ शेखले अर्धशतकीय पारी खेले ।
अनिलले ४५ बलमा ४ चौका र ४ छक्का प्रहार गर्दै ५८ रनको योगदान गरे । आसिफले भने ३५ बलमा २ चौका र ५ छक्का प्रहार गरे । दीपन्द्रे सिंह ऐरी ५ रनमा आउट भए । कुशल भूर्तेल भने १३ रनमा आउट भए । कुशल मल्ल ३७ रनमा अविजित रहे ।
वेस्ट इन्डिज ‘ए’ का लागि ओबेद म्याककोइले ३ विकेट लिए ।
यसअघि टस जितेर ब्याटिङ रोजेको वेस्ट इन्डिज ‘ए’ले पूरै ओभर खेलेर ७ विकेटको क्षतिमा १७२ रन बनाएको थियो ।
वेस्ट इन्डिजका लागि एलिक एथेनाजे ४२ रनमा अविजित रहँदा कप्तान रोस्टन चेसले ३३ रन जोडे ।
नेपालका लागि सागर ढकाल तथा सोमपाल कामीले ३-३ तथा अविनाश बोहराले १ विकेट लिए ।
प्रतिक्रिया