काठमाडौं । प्रमुख प्रतिपक्षी नेपाली कांग्रेसको अवरोधका बीच सरकारले संसदबाटै आगामी आर्थिक वर्ष २०८१/८२ को बजेट ल्याउने तयारी गरेको छ ।
बजेट भाषणका लागि मंगलबार दिउँसो १ बजे संसदको दुवै सदनको संयुक्त बैठक बोलाइएको छ । प्रतिनिधिसभाको आजको बैठकमा सभामुख देवराज घिमिरेले संयुक्त बैठकमा उपस्थितिका लागि दुवै सदनका सांसदहरुलाई आग्रह गरेका छन् । सभामुख घिमिरेले नेपालको संविधानको धारा ११९ बमोजिम जेठ १५ गते संघीय संसदको दुवै सदनको संयुक्त बैठकमा अर्थमन्त्री वर्षमान पुनले आर्थिक वर्ष २०८१/०८२ को राजश्व र व्ययको वार्षिक अनुमान पेश गर्ने जानकारी गराएका हुन् ।
प्रधानमन्त्री प्रचण्डले समेत आजै बजेट ल्याउनुअघि सहमति भैसक्ने बताएका छन् । सहमति नभए संसद अधिवेशन अन्त्य गरेर अध्यादेशबाट बजेट ल्याउने सम्मको विकल्पमा सरकारले आन्तरिक तयारी गरिरहेको छ ।
सरकारले प्रतिपक्षीको अवरोध जारी नै रहेपनि सदनबाटै आगामी आर्थिक वर्ष २०८१/८२ को बजेट ल्याउने तयारी गरेको छ । कांग्रेसको निरन्तर अवरोधका कारण अध्यादेशबाट बजेट ल्याउने चर्चाका बीच बजेट सार्वजनिक गर्न संयुक्त सदनको बैठक तय भएको छ ।
प्रतिक्रिया