काठमाडौं । पृथ्वी राजमार्ग अन्तर्गत नौबिसे-मलेखु सडक भोलि (बुधबार) बाट १५ दिनसम्म रातभर बन्द गरिने भएको छ । सो सडक खण्डमा पर्ने गणेश खोला, डांगडुंग खोला, खेस्टे खोला र पोखरे खोला पुलहरुको प्रबिधिक जाँच तथा मरमत कार्य गर्न रातको समयमा सडक बन्द गरिने भएको नागढुंगा-मुग्लिङ सडक योजना कार्यालयले जनाएको छ ।
कार्यालयले एक सूचना प्रकाशित गर्दै २६ गते देखि साउन ९ गते सम्म पुलहरु मरमत कार्य संचालन गर्दा सडक प्रयोगकर्ताहरुलाई हुन सक्ने जोखिम तथा यातायात आवागमनमा समेत वाधा पर्न जाने देखिएको भन्दै सम्पुर्ण सवारी साधनहरु रोकिने जनाएको छ । सूचनामा सडक प्रयोग गर्दा हुन सक्ने सम्भावित जोखिमलाई मध्यनजर गर्दै राजमार्ग बन्द रहने उल्लेख गरिएको छ ।
सूचनामा सम्पूर्ण सवारी चालकहरुले आफ्नो लेन अनुशासन कायम राख्न तथा जथाभावी ओभरटेक नगर्न समेत अनुरोध गरिएको छ । सो अवधिमा एम्बुलेन्स र सुरक्षा निकायले प्रयोग गर्ने सवारी साधनलाईै भने अवरोध नहुने सूचनामा उल्लेख छ । योजना कार्यालयले बन्द रहने अवधिमा वैकल्पिक मार्गको रुपमा गल्छी-विदुर-छहरे-टोखा सडक प्रयोग गर्न सकिने समेत जनाइएको छ ।
प्रतिक्रिया