काठमाडौं । साफ महिला च्याम्पियनसिप २०२४ फाइनलको पहिलो हाफमा घरेलु टिम नेपाल र बंगलादेशले गोलरहित बराबरी खेलेका छन् ।
बुधबार त्रिपुरेश्वरस्थित दशरथ रंगशालामा जारी पहिलो हाफमा दुवै टिमले गोलका केही अवसर सदुपयोग गर्न सकेनन् । खेलको दोस्रो मिनेटमै बंगलादेशले गोलको सुन्दर अवसर सदुपयोग गर्न सकेन । नेपाली रक्षक गीता राना डिफेन्ड प्रहारमा चिप्लिदा उनको प्रहार सटिक हुन सकेको थिएन । सोही बललाई नियन्त्रणमा लिँदै बंगलादेशी कप्तान सविना खातुनले १८ यार्ड बक्स बाहिरबाट गरेको प्रहार पोस्टमा लागेर फर्कियो । रिबाउन्डमा सविनाले पुनः हेडर गरे पनि त्यसलाई नेपाली गोलकिपर एन्जिला तुम्बाप्पो सुब्बाले सहजै नियन्त्रणमा लिँदै खतरा टारिन् ।
१० औँ मिनेटमा नेपालले गोलको अवसर सदुपयोग गर्न सकेन । सावित्रा भण्डारीले लेफ्ट साइडबाट निकालेको पासलाई नियन्त्रणमा लिँदै १८ यार्ड बक्सबाहिरबाट अमिषा कार्कीले सुन्दर प्रहार गरे पनि बारमा लागेर फर्किँदा नेपालले अग्रता बनाउन सकेन ।
प्रतियोगितामा नेपाल लगातार तेस्रो पटक र बंगलादेश लगातार दोस्रो पटक फाइनल प्रवेश गरेका हुन् ।
प्रतिक्रिया