काठमाडौं । आगामी १५ गतेदेखि सुरु हुन गइरहेको नेपाल प्रिमियर लिग (एनपीएल)को ट्रफी सार्वजनिक भएको छ । प्रधानमन्त्री केपी शर्मा ओलीले सोमबार सुन्धाराको धरहरामा प्रतियोगितामा सहभागी आठवटै टिमका मार्की खेलाडीसहित ट्रफी सार्वजनिक गरेका हुन् ।
सार्वजनिक कार्यक्रममा प्रधानमन्त्री ओलीले खेल क्षेत्रको उत्थानका लागि सरकारले आवश्यक सहयोग र प्रोत्साहन गर्ने प्रतिबद्धता जनाए ।
क्रिकेटले नेपाली युवा शक्तिलाई राष्ट्रिय एकतामा बाँधेको र यसको महत्व अझै धेरै भएको उनको भनाइ थियो । आठवटै टिमका कप्तानहरुको प्रशंसासमेत ओलीले गरेका छन् ।
सो अवसरमा बोल्दै प्रधानमन्त्री ओलीले नेपाल प्रिमियर लिग (एनपिएल) ले नेपालको पर्यटन प्रवर्द्धन र युवा प्रतिभालाई अन्तर्राष्ट्रिय मञ्चमा प्रस्तुत गर्न प्रत्यक्ष सहयोग पुग्ने बताए । उनले लिगका लागि सरकारले सक्दो सहयोग र प्रोत्साहन गर्ने विश्वास दिलाए ।
प्रधानमन्त्री ओलीले खेल क्षेत्रको विकासका लागि सरकार सधैँ खेलाडीको साथमा रहेको बताउँदै एनपिएलले नेपाली क्रिकेटमा नयाँ आयाम थप्ने अपेक्षा व्यक्त गरे । “क्रिकेट हाम्रो पुस्ताको सपना र गौरवको विषय पनि हो । यस लिगको माध्यमबाट नेपाली क्रिकेटमा नयाँ आयाम थप्न सकियोस्”,प्रधानमन्त्री ओलीले भने,“सरकार यहाँहरूकै साथमा छ । व्यक्तिगत रूपमा म सरकारमा हुँदा वा नहुँदा जहिल्यै पनि मेरो रुचि र अपनत्व रहनेछ । सहभागी खेलाडी सबैलाई जितको शुभकामना दिन चाहन्छु ।”
उनले यस खेलमार्फत युवा प्रतिभाको उजागर र नेपालीले अवसर पाएमा केही गर्छ भन्ने मान्यतालाई स्थापित होस् भन्ने कामनासमेत गरे ।
कार्यक्रममा नेपाल क्रिकेट संघ (क्यान)का सचिव पारस खड्काले एनपीएलको ट्रफीको मुख्य आकर्षण सगरमाथाको आधार शिविर कालापत्थरको ढुंगा रहेको जानकारी दिए । उनले यो ट्रफीमात्र नभई विश्वलाई हिमाल संरक्षण गर्ने सन्देश समेत दिएको बताए ।
आरोहीद्वय निमा शेर्पा र मिङ्मा शेर्पाले एनपीएलको ट्रफीमा प्रयोग गरिएको ढुंगा ल्याएका थिए । ट्रफी अनावरण कार्यक्रममा उनीहरुलाई खादा ओढाएर सम्मानसमेत गरिएको छ ।
मंसिर १५ गतेदेखि तीन सातासम्म त्रिवि क्रिकेट मैदानमा हुने लिगमा काठमाडौं, विराटनगर, जनकपुर, चितवन, पोखरा, लुम्बिनी, कर्णाली र सुदूरपश्चिम गरी आठ टोली सहभागी हुँदैछन् ।
लिगका लागि ३० भन्दा बढी विदेशी खेलाडी समेत नेपाल आउँदैछन् । हरेक टोलीले आफ्नो प्रशिक्षक राखेर क्लोज क्याम्प गर्न थालिसकेका छन् ।
प्रतिक्रिया