बुटवल । शुक्रबार राति परेको वर्षाका कराण सडक भासिएर पूर्वपश्चिम राजमार्ग अवरुद्ध बनेको छ । नवलपरासीको दाउन्ने खण्डको बर्दघाट नगरपालिका वडा नम्बर ४ अन्तर्गत पर्ने खुर्सानी खोला नजिकैको सडक भत्किएपछि यातायात अवरुद्ध भएको हो ।
बर्दघाट बजारदेखि करिब ३ किलोमिटर पश्चिम खुर्सानी खोला क्षेत्रमा करिब ७ मिटर सडक भासिएको तथा सडक स्तरोन्नतिको क्रममा गरिएको ढलान समेत उप्किएको प्रहरीले जनाएको छ ।
शुक्रबार राति करिब ११ बजेबाट अवरुद्ध सडक शनिबार बिहानसम्म पनि सञ्चालनमा आउन सकेको छैन ।
दाउन्ने सडक खण्ड केही दिन अघि आंशिक रूपमा बन्द गरेर सडक निर्माण कार्य भइरहेको थियो । पछिल्लो समय सामान्य वर्षामा समेत कहिले सडक चिप्लो त कहिले पहिरोको कारण अवरुद्ध हुँदै आइरहेको छ ।
शुक्रबार रातिदेखि नै सडक अवरुद्ध हुँदा यो सडक हुँदै सञ्चालन हुने सवारीहरू सडकमै रोकिएका छन् ।
प्रतिक्रिया