महरा प्रकरणमा जोडिएकी रोशनी शाही मृत फेला

काठमाडौं । पटक पटक विवादमा आइरहने पूर्वसभामुख कृष्णबहादुर महरा जोडिएको बलात्कार प्रकरणकी पीडित रोशनी शाही मृत अवस्थामा फेला परेकी छिन् । भक्तपुरको सूर्यविनायक नगरपालिका–३ बालकोटमा शाही मृत अवस्थामा फेला परेकी हुन् ।

बालकोटको बृहस्पति मार्गस्थित लक्ष्मीश्वर महतोको तीनतले घरमा डेरा गरेर बस्ने ५० वर्षिया शाही मृत अवस्थामा फेला परेकी प्रहरीले जनाएको छ । शाही पूर्वसभामुख कृष्णबहादुर महरामाथि लागेको बलात्कार आरोप प्रकरणकी पीडित हुन् । पछि अदालतबाट महराले यसमा सफाइ पाइसकेका छन् ।

आइतबार दिउँसो १ बजेर ५० मिनेटमा कोठाभित्रै मृत अवस्थामा शाही फेला परेकी जिल्ला प्रहरी कार्यालय भक्तपुरका प्रहरी उपरीक्षक माधव बुढाथोकीले जानकारी दिए ।

भित्रबाट चुकुल लगाएको कोठाभित्र उनको शव फेला परेको बताइएको छ । प्रहरीका अनुसार घटनास्थलमा सुसाइड नोट पनि फेला परेको छ । शाहीको स्थायी घर जाजरकोट रहेको प्रहरीले जनाएको छ ।