काठमाडौं । गायन रियालिटी शो ‘नेपाल आइडल’ को छैटौँ सिजनको विजेता सिन्धुपाल्चोककी गंगा सोनाम बनेकी छन् । आइतबार ललितपुरमा सम्पन्न ग्रान्ड फिनालेमा अनलाइन भोटिङको आधारमा उनी विजेता घोषित भइन् ।
२० वर्षीया गंगा सोनाम सिन्धुपाल्चोकको इन्द्रावती गाउँपालिका-१०, बडहरेकी निवासी हुन् । उनी पिता ध्रुव सोनाम र आमा सीता सोनामकी कान्छी सन्तान हुन् । गंगाले गाउँकै चण्डेश्वरी माविबाट कक्षा १२ उत्तीर्ण गरेकी हुन् । विजेता बनेसँगै उनले नगद २५ लाख रुपैयाँ पुरस्कार प्राप्त गरिन् ।
यस सिजनको फिनालेमा सिन्धुपाल्चोककी गंगासहित सिक्किमकी बबिता थापा मगर, दार्जिलिङका अभिनय खाती, चितवनकी दर्शना गान्धारी र काठमाडौंका मृनल मानन्धरबीच प्रतिस्पर्धा भएको थियो ।
फिनालेमा बबिता थापा मगर फर्स्ट रनरअप बन्दै १० लाख रुपैयाँ पाउँदा चितवनकी दर्शना गान्धारी सेकेन्ड रनरअप भइन् र ५ लाख रुपैयाँ प्राप्त गरिन् । त्यस्तै, अभिनय खाती चौथो स्थानमा रहँदा मृनल मानन्धर पाँचौँ भए । दुवैले १-१ लाख रुपैयाँ पुरस्कार हात पारे ।
नेपाल आइडल सिजन-६ सुरेश पौडेल र एलेन श्रेष्ठको निर्देशनमा बनेको हो । निर्णायकको भूमिकामा न्ह्यू बज्राचार्य, कालीप्रसाद बाँस्कोटा र इन्दिरा जोशी रहेका थिए ।
नेपाल आइडलको इतिहासमा यसअघि बुद्ध लामा (पहिलो सिजन), रवि ओड (दोस्रो सिजन), सज्जा चौलागाईं (तेस्रो सिजन), भुपेन्द्र थापा मगर (चौथो सिजन) र करण परियार (पाँचौँ सिजन) विजेता भएका थिए ।
प्रतिक्रिया