काठमाडौं । अखिल नेपाल फुटबल संघ (एन्फा)को आयोजनामा नेपाल र बंगलादेशबीचको अन्तर्राष्ट्रिय मैत्रीपूर्ण फुटबल आज हुँदैछ । राजधानीको दशरथ रंगशालामा हुने खेल साँझ ५:३० बजेदेखि सुरु हुने एन्फाले जनाएको छ ।
मैत्रीपूर्ण फुटबल दुई खेल हुनेछ र विजेता टिमलाई ट्रफी तथा पदक प्रदान गरिनेछ । दुवै टोलीले तयारी पूरा गरेको भन्दै जितका साथ ट्रफी आफ्नो पक्षमा पार्ने दाबी गरेका छन् ।
शुक्रबार काठमाडौंमा आयोजित प्रिम्याच कन्फ्रेन्समा नेपाली राष्ट्रिय फुटबल टोलीका कप्तान किरण चेम्जोङले घरेलु मैदानमा खेल्न पाउनु उत्साहजनक रहेको भन्दै जितप्रति विश्वास व्यक्त गरे । उनले टिम उत्कृष्ट तयारी अवस्थामा रहेको र घरेलु दर्शकसमक्ष राम्रो प्रदर्शन गर्ने प्रतिबद्धता जनाए ।
त्यस्तै, मुख्य प्रशिक्षक म्याट रसले पनि नेपाली टोली जितको लक्ष्यसहित मैदानमा उत्रिने बताए । उनले घरेलु मैदानमा हुने प्रतिस्पर्धा निकै रोचक र प्रतिस्पर्धात्मक हुने विश्वास व्यक्त गरे ।
बंगलादेशका कप्तान र प्रशिक्षकले समेत आफूहरू बलियो प्रतिद्वन्द्वीका रूपमा उपस्थित हुने बताएका छन् । उनीहरूले खेललाई चुनौतीपूर्ण र प्रतिस्पर्धात्मक बनाउन प्रतिबद्ध रहेको उल्लेख गरेका छन् ।
एन्फाका अनुसार खेल हेर्न चाहने दर्शकका लागि भीआईपीतर्फको टिकट मूल्य एक हजार रुपैयाँ र सामान्य पारापिटतर्फको टिकट मूल्य ५०० रुपैयाँ तोकिएको छ ।
प्रतिक्रिया