काठमाडौँ । पछिल्लो १२ घण्टामा कोशी प्रदेशको झापा र इलाम क्षेत्रमा सबैभन्दा बढी वर्षा भएको छ । आज पनि मौसम बदली भई मनसुनी वायुको प्रभावले पूर्वी नेपाल थप प्रभावित बनाउने सम्भावना रहेको जल तथा मौसम विज्ञान विभागले बुलेटिनमार्फत जानकारी दिएको छ ।
महाशाखाका अनुसार पछिल्लो १२ घण्टामा सबैभन्दा बढी इलामको सूर्योदयमा २४२.६ मिलिमिटर वर्षा भएको छ ।
पछिल्लो १२ घण्टामा झापाको बाहुन डाँगीमा १९५.४, इलाम टि स्टेटमा १७८.४, अर्नाबारी बिर्तामा १३४ र चन्द्रागढी एयरपोर्टमा १२५.४ मिलिमिटर वर्षा मापन भएको जल तथा मौसम विज्ञान विभाग, मौसम पूर्वानुमान महाशाखाले जनाएको छ ।
विभागका अनुसार काठमाडौँमा आइतबार बिहानदेखि वर्षा रोकिएसँगै पूर्वतिर मनसुनी वर्षा धकेलिएको हो । शुक्रबार र शनिबारको वर्षाले पश्चिम नेपालबाहेकको क्षेत्रमा जनजीवन प्रभावित भएको छ ।
आज दिनभर नै कोशी प्रदेशका अधिकांश भाग, मधेस प्रदेश र बागमती प्रदेशका केही भागमा वर्षा हुने विभागले जनाएको छ ।
इलाममा मृत्यु हुनेको संख्या ३४ पुग्यो
अविरल वर्षाका कारण गएको पहिरोमा परी इलाममा हालसम्म मृत्यु हुनेको संख्या ३४ पुगेको छ । इलामको सूर्योदय-१ मा ५, इलाम नगरपालिका-१ मा ६ जना, देउमाइमा ८, फाकफोकथुपमा १, माङ्सेबुङमा ३, माइजोगमाइमा ७ र सन्दकपुरमा ४ जनाको मृत्यु भएको सशस्त्र प्रहरीले जनाएको छ ।
पहिरोका कारण घर पुरिएपछि यतिधेरै संख्यामा मानवीय क्षति भएको हो । पहिरो प्रभावित क्षेत्रमा सुरक्षा निकायहरुले उद्दार कार्य गरिरहेका छन् । घाइतेहरुलाई हेलिकप्टरबाट उपचारका लागि लैजान थालिएको हो ।
प्रतिक्रिया