मधेशको मुख्यमन्त्रीमा लोसपाका जितेन्द्र सोनलले दाबी पेश गर्दै

मधेशमा कांग्रेस एमाले बाहेकको सरकार बनाउन बाँकी दलहरुबीच सहमति, जितेन्द्र सोनलबाट मुख्यमन्त्रीमा दाबी पेश

जनकपुरधाम । मधेश प्रदेशको मुख्यमन्त्रीमा लोसपा संसदीय दलका नेता जितेन्द्र सोनललाई मुख्यमन्त्री बनाउन कांग्रेस एमाले इतरका दलहरुबीच सहमति भएको छ ।
सहमतिलगत्तै ५६ सांसदको समर्थनसहित दलहरु मुख्यमन्त्रीमा दाबी पेश गर्ने तयारी गरेका छन् ।

निवर्तमान मुख्यमन्त्री सतिशकुमार सिंहले हिजो राजीनामा दिएपछि कांग्रेसले बुहमत सांसदको समर्थनसहित मुख्यमन्त्रीमा दाबी पेश गर्ने अनुमान गरिएको थियो । तर, कांग्रेस र एमालेको पनि समर्थन विना बाँकी दलहरुले सोनललाई मुख्यमन्त्रीमा प्रस्ताव गरेका हुन् । सोनललाई मुख्यमन्त्री बनाउन लोसपा, जसपा, माओवादी केन्द्र, एकीकृत समाजवादी र जनमत पार्टीबीच सहमति जुहेको हो ।

सहमति पत्रमा जसपा संसदीय दलका नेता सरोजकुमार यादव, जनमत पार्टीका नेता महेश यादव, माओवादी केन्द्रका युवराज भट्टराई, लोसपाका जयनुल राय र एकीकृत समाजवादीका नेता गोविन्दप्रसाद न्यौपानेले हस्ताक्षर गरेका छन्।

तर जनमत पार्टीभित्रको विवादले मधेशको राजनीति तरल बनेको छ । जनमतका सबै १३ जनाले सोनललाई समर्थन गर्ने संभावना भने कमै छ ।

प्रदेस सभामा जसपाका १९, जनमतका १३ सांसद छन् । यस्तै नेकपा माओवादी केन्द्र र लोसपाका ९–९ सांसद छन् भने नेकपा एकीकृत समाजवादीको ७ सिट छ। प्रदेशसभाको सबैभन्दा ठूलो दल एमालेसँग २५ सिट छ भने कांग्रेससँग २२ सिट छ। नागरिक उन्मुक्ति, राप्रपा र संघीय समाजवादी पार्टीको १–१ सिट रहेको छ ।