काठमाडौं । पटक-पटक स्थगित हुँदै आएको नेपाली कांग्रेसको केन्द्रीय कार्यसमितिको बैठक आज बस्दै छ । आगामी पुस २६ देखि २९ गतेसम्म १५ औँ महाधिवेशन गर्ने सहमति बनेपछि बैठक आजै बस्ने भएको हो ।
असोज २८ गतेदेखि महाधिवेशनसम्बन्धी विवादमा अल्झिएको कांग्रेसले सभापति शेरबहादुर देउवाको निर्देशनअनुसार निकास निकालेसँगै बैठकको मार्ग खुलेको हो ।
आजको बैठकमा कार्यतालिकासम्बन्धी प्रस्ताव कार्यवाहक सभापति पूर्णबहादुर खड्काले पेस गर्नेछन् । आइतबार महामन्त्री गगन थापा, विश्वप्रकाश शर्मा, नेता रमेश लेखक तथा प्रचार विभाग प्रमुख मीन विश्वकर्मासमेतको उपस्थितिमा कार्यवाहक सभापति खड्काले सभापतिको आग्रहअनुसार कार्यतालिका प्रस्ताव तयार पारेका थिए ।
यसअघि महामन्त्री र सहमहामन्त्रीले छुट्टाछुट्टै प्रस्ताव पेस गरेकाले सहमतिको रूपमा कार्यवाहक सभापतिकै प्रस्ताव बैठकमा प्रस्तुत गर्न लागिएको हो । स्रोतका अनुसार कार्यतालिका प्रस्ताव छलफलका लागि नभई निर्णयार्थ पेस गरिनेछ ।
स्रोतले भन्यो, “जसरी सदनमा टेबुल गर्ने क्रममा मन्त्रीले प्रस्ताव राख्छन् र अन्त्यमा सभामुखले निर्णयार्थ प्रस्ताव प्रस्तुत गर्छन्, त्यस्तै प्रक्रिया यहाँ पनि हुनेछ । यदि कसैले विमति राखेमा मतविभाजनमार्फत निर्णय हुनेछ ।”
प्रतिक्रिया