काठमाडौं । एसीसी पुरुष यू-१९ एशिया कप अन्तर्गत आज नेपालले बंगलादेशसँग प्रतिस्पर्धा गर्दैछ । दुबईस्थित आइसीसी एकेडेमीमा हुने खेल नेपाली समयअनुसार बिहान १०ः४५ बजेदेखि सुरु हुनेछ ।
जारी प्रतियोगितामा नेपालले पहिलो खेलमा श्रीलंकासँग पराजय भोगेको थियो । उता, बंगलादेशले आफ्नो पहिलो खेलमा अफगानिस्तानलाई पराजित गर्दै विजयी सुरुआत गरेको छ । आजको खेल दुवै टोलीका लागि महत्वपूर्ण मानिएको छ, जहाँ नेपाल जित निकाल्दै प्रतियोगितामा पुनरागमन गर्ने लक्ष्यमा छ ।
नेपालले समूह चरणको अर्को खेल डिसेम्बर १७ मा अफगानिस्तानसँग खेल्ने तालिका रहेको छ ।
एकदिवसीय फर्म्याटमा आयोजना भइरहेको एसीसी यू-१९ एशिया कपमा आइसीसीका पूर्णकालीन सदस्य राष्ट्र अफगानिस्तान, बंगलादेश, भारत, पाकिस्तान र श्रीलंका सिधै छनोट भएका छन् । त्यसैगरी, प्रिमियर कपबाट नेपाल र युएई छनोट भएका हुन् । नेपाल समूह ‘बी’ मा अफगानिस्तान, बंगलादेश र श्रीलंकासँग रहेको छ ।
नेपाल क्रिकेट संघ (क्यान) ले अशोक धामीको कप्तानीमा १५ सदस्यीय यू-१९ टोली प्रतियोगिताका लागि युएई पठाएको छ। टोलीका उपकप्तान निरज यादव रहेका छन् । नेपाली टोलीमा अशोक धामी (कप्तान), निरज यादव (उपकप्तान), निश्चल क्षेत्री, किब्रिन श्रेष्ठ, दयानन्द मण्डल, दिलसाद अली, नितेश पटेल, चन्दन राम, भान्स क्षेत्री, अभिषेक तिवारी, सहिल पटेल, आशिष लहार, विपिन शर्मा, रोशन विक र युवराज खत्री समावेश छन् ।
प्रतिक्रिया