काठमाडौं । काठमाडौं महानगरपालिकाका मेयर बालेन्द्र शाह (बालेन) र राष्ट्रिय स्वतन्त्र पार्टीका सभापति रवि लामिछानेबीच भइरहेको वार्तास्थलमा अप्रत्याशित घटनाक्रम देखिएको छ । वार्ता चलिरहेकै क्रममा विघटित प्रतिनिधिसभाका स्वतन्त्र सांसद डा. अमरेशकुमार सिंह सो स्थानमा पुगेका छन् ।
त्यसैक्रममा ‘हामी नेपाल’ नामक संस्थाका संयोजक सुधन गुरुङ पनि वार्तास्थलमा उपस्थित भएका छन् । उनले रवि र बालेनबीच सहमति नभएसम्म दुवैलाई बाहिर निस्कन नदिने भन्दै वार्तास्थलको ढोका बाहिरबाट ताला लगाइदिएका छन् । हातमा चाबी बोकेका गुरुङले देशको वर्तमान राजनीतिक अवस्था, जनतामा बढ्दो असन्तोष र नेतृत्वबीचको असमझदारी अन्त्यका लागि दुवै नेताबीच ठोस सहमति आवश्यक रहेको बताएका छन् ।
घटनास्थलमा केही समय तनावपूर्ण अवस्था सिर्जना भए पनि सुरक्षा निकाय र उपस्थित व्यक्तिहरूले स्थिति नियन्त्रणमा लिने प्रयास गरेका छन् । वार्तामा के विषयमा छलफल भइरहेको छ भन्नेबारे आधिकारिक जानकारी सार्वजनिक गरिएको छैन । तर, पछिल्लो समय देशको राजनीतिक अवस्थाबारे बालेन र रविबीच संवाद भइरहेको चर्चा चल्दै आएको थियो ।
डा. अमरेशकुमार सिंहले पनि मुलुकको वर्तमान राजनीतिक संकट समाधानका लागि जिम्मेवार नेताहरू एक ठाउँमा बसेर स्पष्ट मार्गचित्र बनाउनुपर्ने बताएका छन् । “जनताले अब नाटक होइन, समाधान चाहेका छन्,” उनको भनाइ थियो ।
घटनाबारे थप विवरण आउन बाँकी रहेको छ ।
प्रतिक्रिया