काठमाडौं । नेपाल राष्ट्र बैंकले बजारमा बढ्दो तरलता व्यवस्थापन गर्न २५ अर्ब रुपैयाँ बराबरको ऋणपत्र निष्कासन गर्ने भएको छ।
राष्ट्र बैंकले खुला बजार कारोबारअन्तर्गत एक वर्षे अवधिको ‘नेपाल राष्ट्र बैंक ऋणपत्र-२०८३ ‘क’ उपकरण निष्कासन गर्न लागेको हो। यसका लागि बोलकबोल प्रक्रिया सोमबार पुस १४ गते मध्याह्न २ बजेसम्म अनलाइन प्रणालीमार्फत सञ्चालन हुनेछ।
राष्ट्र बैंकका अनुसार ऋणपत्रको ब्याजदर बोलकबोल प्रक्रियाबाटै निर्धारण गरिनेछ। यसको सावाँ २०८३ पुस १४ गते भुक्तानी हुनेछ भने ब्याज अर्धवार्षिक रूपमा प्रदान गरिनेछ।
बोलकबोल प्रक्रियामा ‘क’, ‘ख’ र ‘ग’ वर्गका बैंक तथा वित्तीय संस्थाहरू मात्र सहभागी हुन पाउनेछन्। सहभागी संस्थाहरूले न्यूनतम ५ करोड रुपैयाँदेखि अधिकतम आह्वान रकमसम्म, ५ करोडले भाग गर्दा निःशेष भाग जाने गरी बोलकबोल गर्न सक्ने व्यवस्था गरिएको छ।
स्वीकृत बोल रकम सम्बन्धित बोलवालाको लगानी पोर्टफोलियोमा समावेश हुने भएकाले उक्त रकमलाई अनिवार्य नगद मौज्दात (सीआरआर)मा गणना गर्न पाइने छैन। तर राष्ट्र बैंकको निर्देशनअनुसार कायम गर्नुपर्ने वैधानिक तरलता अनुपात तथा खुद तरल सम्पत्ति अनुपातमा भने उक्त रकम गणना गर्न सकिनेछ।
प्रतिक्रिया