काठमाडौं । आगामी फागुन २१ गते हुने प्रतिनिधिसभा सदस्य निर्वाचनका लागि ६३ राजनीतिक दलले समानुपातिकतर्फको बन्दसूची निर्वाचन आयोगमा बुझाएका छन् । आयोगका अनुसार हालसम्म प्रमुख तथा साना गरी ६३ दलले आ-आफ्नो बन्दसूची दर्ता गराइसकेका छन् भने अब नेपाली कांग्रेसको सूची आउन बाँकी छ ।
नेकपा (एमाले), नेपाली कम्युनिस्ट पार्टी, राष्ट्रिय स्वतन्त्र पार्टी (रास्वपा)सहितका दलले तोकिएको समयभित्र समानुपातिकतर्फको बन्दसूची बुझाएका हुन् । यससँगै नेपाल मजदुर किसान पार्टी, नेपाल लोकतान्त्रिक पार्टी, राष्ट्रिय जनमोर्चा, जनप्रिय लोकतान्त्रिक पार्टी, नेपाल कम्युनिस्ट पार्टी (माक्र्सवादी-पुष्पलाल), गतिशील लोकतान्त्रिक पार्टी, जनता समाजवादी पार्टी नेपाल, समावेशी समाजवादी पार्टी, समावेशी समाजवादी पार्टी नेपाल लगायतका दलले पनि आफ्नो सूची आयोगमा दर्ता गराएका छन् ।
यस्तै, नेपाल जनता संरक्षण पार्टी, नागरिक शक्ति नेपाल, राष्ट्रिय जनमुक्ति पार्टी, मंगोल नेशनल अर्गनाइजेशन, उन्नत लोकतन्त्र पार्टीसहितका दलले पनि समानुपातिक उम्मेदवारको बन्दसूची बुझाएको निर्वाचन आयोगले जनाएको छ ।
आयोगका अनुसार हालसम्म ६३ दलले बन्दसूची बुझाइसकेका छन् भने नेपाली कांग्रेसको सूची आउन बाँकी छ । कांग्रेस सभापति शेरबहादुर देउवाको हस्ताक्षरका लागि पार्टीका मुख्यसचिव कृष्ण पौडेल र प्रचार विभाग प्रमुख मीन विश्वकर्मा महाराजगन्ज पुगेको भए पनि सूची अझै आयोगमा बुझ्न बाँकी रहेको जनाइएको छ । कांग्रेसले सूची बुझाएसँगै बन्दसूची पेश गर्ने दलको संख्या ६४ पुग्नेछ ।
निर्वाचन आयोगका अनुसार समानुपातिक प्रणालीतर्फ उम्मेदवारी दिने ६४ दलले ५८ वटा चुनाव चिह्न प्रयोग गर्ने भएका छन् । केही दलले संयुक्त चुनाव चिह्न प्रयोग गरेर निर्वाचनमा सहभागी हुने तयारी गरेका छन् ।
आयोगले तोकिएको समयभित्र सबै दलको बन्दसूची दर्ता गरिसकेपछि नामावली परीक्षण, दाबी–विरोध र अन्तिम सूची प्रकाशनको प्रक्रिया अघि बढाउने जनाएको छ ।
प्रतिक्रिया