रुपन्देहीमा माघ ३ गते तन्त्र एवं ज्योतिष प्रशिक्षणात्मक गोष्ठी हुँदै

बुटवल । तन्त्र र ज्योतिषसम्बन्धी सम्पूर्ण ज्ञान तथा वैज्ञानिक, शास्त्रीय र व्यवहारिक जानकारी प्रदान गर्ने उद्देश्यका साथ रुपन्देहीमा तन्त्र एवं ज्योतिष प्रशिक्षणात्मक गोष्ठी सञ्चालन हुने भएको छ । दक्षिण एसियाली ज्योतिष महासंघ, लुम्बिनी प्रदेशको आयोजनामा यहीँ माघ ३ गते रुपन्देहीको तिलोत्तमास्थित मणिग्राममा उक्त गोष्ठी आयोजना गरिने भएको हो ।

आयोजकका अनुसार गोष्ठीमा ज्योतिष र तन्त्रको शास्त्रीय आधार, व्यवहारिक प्रयोग र सामाजिक जिम्मेवारीका विषयमा गहन प्रशिक्षण प्रदान गरिनेछ । समाजमा बढ्दो भ्रम, अर्धज्ञान र अव्यवस्थित प्रयोगका कारण ज्योतिष र तन्त्रप्रति देखिएको नकारात्मक धारणा चिर्ने उद्देश्यले गोष्ठी आयोजना गरिएको जनाइएको छ ।

कार्यक्रम संयोजक ज्योतिष चुडामणि पाण्डेले ज्योतिष र तन्त्रका विषयमा उठ्ने विभिन्न जिज्ञासाहरूको समाधान गर्ने उद्देश्यसहित पहिलो पटक यस्तो किसिमको प्रशिक्षणात्मक गोष्ठी आयोजना गर्न लागिएको बताए । उनले तन्त्र र ज्योतिषको आवश्यकता, सामाजिक महत्व र दैनिक जीवनमा यसको सही प्रयोगबाट लिन सकिने लाभबारे जानकारी लिन सबैलाई सहभागी हुन आग्रह गरे ।

गोष्ठीमा सहभागिता निःशुल्क रहने व्यवस्था मिलाइएको छ । दक्षिण एसियाली ज्योतिष महासंघ, लुम्बिनी प्रदेशका महासचिव अनुप पौडेलले ज्योतिषसम्बन्धी भ्रम, अर्धज्ञान र अव्यवस्थित प्रयोगकै कारण समाजमा नकारात्मक धारणा फैलिएको उल्लेख गर्दै यस्ता कार्यक्रमले त्यसलाई हटाउन सहयोग पुग्ने विश्वास व्यक्त गरे ।

गोष्ठीमा विषयगत विज्ञहरूले विभिन्न महत्वपूर्ण विषयमा प्रशिक्षण दिनेछन् । नेपाल संस्कृत विश्वविद्यालयका प्रा. डा. अर्जुन भट्टराईले प्रेम विवाह र सम्बन्धविच्छेदका विषयमा ज्योतिषीय समाधानबारे प्रशिक्षण दिनेछन् भने प्रा. डा. माधवप्रसाद लामिछानेले नेपाली समाजमा तन्त्रको प्रयोग र यसको उपयोगिताबारे धारणा प्रस्तुत गर्नेछन् । त्यसैगरी प्राध्यापक नारायणप्रसाद भण्डारीले राशीफल लेखनसम्बन्धी व्यावहारिक प्रशिक्षण प्रदान गर्ने कार्यक्रम रहेको छ ।

ज्योतिष ज्ञानेन्द्र पन्थीले ज्योतिषसम्बन्धी उठ्ने प्रश्नहरूको निराकरण गर्दै भविष्यवाणीमा एकरूपता ल्याउन यो गोष्ठी कोशेढुंगा सावित हुने विश्वास व्यक्त गरे ।

गोष्ठीको उद्घाटन लुम्बिनी प्रदेशका भौतिक पूर्वाधार तथा विकास मन्त्री भूमिश्वर ढकालले गर्ने कार्यक्रम रहेको छ । आयोजकका अनुसार गोष्ठीमा ५०० भन्दा बढी सहभागीको उपस्थिति रहने अपेक्षा गरिएको छ ।