काठमाडौं । आगामी फागुन २१ गते हुने प्रतिनिधिसभा निर्वाचनका लागि प्रत्यक्षतर्फका उम्मेदवार टुंगो लगाउन राष्ट्रिय स्वतन्त्र पार्टी (रास्वपा) को केन्द्रीय समिति बैठक आज बस्दैछ । बैठक दिउँसो २ बजे पार्टी केन्द्रीय कार्यालय वनस्थलीमा बस्ने तय भएको छ ।
बैठकले देशभरका १६५ वटै प्रतिनिधिसभा निर्वाचन क्षेत्रमा प्रत्यक्षतर्फ उठाइने उम्मेदवारहरूको नाम अन्तिम रूप दिने तयारी गरेको पार्टीले जनाएको छ । निर्वाचन आयोगले माघ ६ गते प्रत्यक्षतर्फको उम्मेदवारी दर्ताको समय तोकेकाले त्यसअघि नै उम्मेदवारको टुंगो लगाउनु आवश्यक रहेको पार्टीको बुझाइ छ ।
उम्मेदवारी दर्ताका लागि उम्मेदवार स्वयं सम्बन्धित निर्वाचन क्षेत्रमा उपस्थित हुनुपर्ने व्यवस्था रहेकाले समयको चापलाई ध्यानमा राख्दै आजै केन्द्रीय समितिबाट उम्मेदवार चयन गर्ने तयारी गरिएको हो । रास्वपाले आन्तरिक छलफल, क्षेत्रीय मूल्याङ्कन र सिफारिसका आधारमा उम्मेदवार छनोट प्रक्रिया अगाडि बढाउँदै आएको बताइएको छ ।
यसैबीच अन्य प्रमुख राजनीतिक दलहरू पनि उम्मेदवार चयनको अन्तिम तयारीमा जुटेका छन् । नेकपा (एमाले) ले केही निर्वाचन क्षेत्रबाहेक अधिकांश क्षेत्रमा उम्मेदवारको नाम टुंग्याइसकेको छ । नेपाली कांग्रेसमा भने पार्टीको आधिकारिकता, विशेष महाधिवेशन र नेतृत्व विवादका कारण उम्मेदवार चयन प्रक्रिया थप पेचिलो बनेको छ । विशेष महाधिवेशन पक्षले निर्वाचन आयोगबाट आधिकारिकताको प्रमाणपत्र पाएपछि कांग्रेसभित्रको विवाद अझै चर्चामा आएको छ ।
दलहरूबीच उम्मेदवार छनोटलाई लिएर तीव्र गतिविधि बढेसँगै प्रतिनिधिसभा निर्वाचनको माहोल क्रमशः तातिँदै गएको छ ।
प्रतिक्रिया