निर्वाचनका लागि सुनसरीमा निर्वाचन प्रहरीको शारीरिक परीक्षण, मागभन्दा बढी आवेदन

सुनसरी । आगामी फागुन २१ गते हुने प्रतिनिधिसभा निर्वाचनका लागि खटाइने निर्वाचन प्रहरी छनोटको प्रक्रिया सुनसरीमा तीव्र रूपमा अघि बढेको छ । सोही क्रममा सुनसरीको इनरुवा नगरपालिका-४ स्थित नयाँ बसपार्क क्षेत्रमा निर्वाचन प्रहरीका लागि शारीरिक परीक्षण सञ्चालन गरिएको छ ।

शारीरिक परीक्षणमा सहभागी हुन सुनसरीसहित आसपासका जिल्लाबाट ठूलो संख्यामा युवायुवतीको सहभागिता देखिएको छ । निर्वाचनलाई स्वच्छ, स्वतन्त्र र भयरहित वातावरणमा सम्पन्न गर्न आवश्यक सुरक्षाकर्मी व्यवस्थापनका लागि निर्वाचन प्रहरी छनोट प्रक्रिया सुरु गरिएको जिल्ला प्रहरी कार्यालय सुनसरीले जनाएको छ ।

जिल्ला प्रहरी कार्यालय सुनसरीका अनुसार यसपटक जिल्लामा कुल ३ हजार ५७८ जना निर्वाचन प्रहरीको माग गरिएको थियो । तर उक्त मागभन्दा बढी अर्थात् ४ हजार ८३३ जनाले निर्वाचन प्रहरीका लागि आवेदन दिएका छन् । मागभन्दा बढी आवेदन परेपछि प्रतिस्पर्धात्मक रूपमा शारीरिक परीक्षण तथा छनोट प्रक्रिया अघि बढाइएको प्रहरीले जनाएको छ ।

शारीरिक परीक्षणमा उचाइ, तौल, दौड, फुर्ती लगायतका मापदण्डका आधारमा उम्मेदवारहरूको मूल्यांकन भइरहेको छ । परीक्षणमा सफल हुने उम्मेदवारहरूलाई आवश्यक तालिमपछि निर्वाचन सुरक्षामा खटाइनेछ ।

जिल्ला प्रहरी कार्यालयले निर्वाचन सुरक्षालाई प्राथमिकतामा राख्दै पारदर्शी र निष्पक्ष ढंगले निर्वाचन प्रहरी छनोट प्रक्रिया अघि बढाइएको जनाएको छ । साथै, शान्तिपूर्ण निर्वाचन सम्पन्न गर्न सुरक्षा संयन्त्र पूर्ण रूपमा तयारी अवस्थामा रहेको समेत प्रहरी प्रशासनले स्पष्ट पारेको छ ।