बुटवल । रूपन्देही निर्वाचन क्षेत्र नम्बर २ की राष्ट्रिय प्रजातन्त्र पार्टी (राप्रपा) की उम्मेदवार कर्भिका थापाले प्रतिनिधिसभा सदस्य पदको उम्मेदवारी फिर्ता लिएकी छन् । कसैबाट विरोध वा उजुरी नआए पनि पार्टीको आग्रह र संविधानिक प्रावधानका कारण आफूले उम्मेदवारी फिर्ता लिएको थापाले बताइन् ।
उनले जारी गरेको विज्ञप्तिमा नेपालको संविधानको धारा २९१ अनुसार विदेशमा रहँदा प्राप्त कुनै पनि कार्ड परित्याग गरेको कम्तीमा तीन महिना पूरा भएपछि मात्र उम्मेदवारी दिन पाउने व्यवस्था रहेको उल्लेख छ । सो अवधि पूरा नहुँदै उम्मेदवारी दर्ता भएकाले संवैधानिक जटिलता नआओस् भन्ने उद्देश्यले उम्मेदवारी फिर्ता लिएको थापाले स्पष्ट पारेकी छन् ।
थापाले प्रतिनिधिसभा निर्वाचनका लागि मनोनयन पाउनु आफ्नो लागि ठूलो सम्मान भएको उल्लेख गर्दै पार्टी र मतदाताप्रति आभार व्यक्त गरेकी छन् । उनले भविष्यमा पनि राष्ट्र र जनताको सेवामा सक्रिय रहने प्रतिबद्धता व्यक्त गरेकी छन् ।
विज्ञप्तिअनुसार कर्भिका थापा विगत १४ वर्षदेखि विदेशमा शिक्षा अध्ययन तथा विभिन्न सीप आर्जनमा संलग्न रहँदै आएकी थिइन् । उम्मेदवारी फिर्तासँगै रूपन्देही-२ मा राप्रपाको चुनावी रणनीतिमा फेरबदल हुने देखिएको छ ।
प्रतिक्रिया