बुटवल । बुटवल–पाल्पा सडक खण्डअन्तर्गत तिनाउ गाउँपालिका–३मा शनिबार भएको सवारी दुर्घटनामा मोटरसाइकलमा सवार दुई जनाको मृत्यु भएको छ ।
बुटवलबाट पाल्पातर्फ जाँदै गरेको लु ४९ प ७७९५ नम्बरको मोटरसाइकललाई विपरीत दिशाबाट आउँदै गरेको लु २ ख १८८३ नम्बरको टिप्परले ठक्कर दिएको थियो । टिप्परको ठक्करबाट मोटरसाइकलमा सवार दुवै जना गम्भीर घाइते भएका थिए । ठक्करपछि घाइतेहरूलाई थप उपचारका लागि बुटवलको लुम्बिनी प्रादेशिक अस्पतालमा ल्याइएपनि चिकित्सकले मृत घोषणा गरेका थिए ।
दुर्घटनामा मृत्यु हुनेमा कालिगण्डकी गाउँपालिका-४ पुर्तिघाट निवासी ३१ वर्षीय मिलन सार्की रहेका छन् भने अर्का मृतक अन्दाजी ३० वर्षीया महिलाको हालसम्म पहिचान खुलेको छैन ।
जिल्ला प्रहरी कार्यालय पाल्पाका प्रहरी नायव उपरीक्षक होमप्रकाश चौधरीका अनुसार मृतक महिलाको पहिचान खुलाउने तथा घटनाबारे थप अनुसन्धान भइरहेको छ ।
दुर्घटनापछि टिप्पर र चालकलाई प्रहरीले नियन्त्रणमा लिएको जनाएको छ । विशेषगरी सिद्धार्थ राजमार्ग क्षेत्रमा पछिल्लो समय सवारी चाप बढ्नु, तीव्र गति र लापरबाहीका कारण दुर्घटनाका घटना बढ्दै गएको भन्दै प्रहरीले सावधानी अपनाउन सर्वसाधारणलाई आग्रह गरेको छ ।
प्रतिक्रिया