काठमाडौं । विश्वकै लोकप्रिय भिडियो प्लेटफर्म युट्युब करिब एक घण्टा अवरुद्ध भएपछि पुनः सञ्चालनमा आएको छ । बुधबार बिहान अचानक सेवा अवरुद्ध हुँदा विश्वभरका करोडौं प्रयोगकर्ता प्रभावित भएका थिए ।
अन्तर्राष्ट्रिय सञ्चारमाध्यमहरूका अनुसार करिब एक घण्टासम्म सेवा पूर्ण रूपमा प्रभावित बनेको थियो । सेवा निगरानी गर्ने वेबसाइट डाउनडिटेक्टरका अनुसार समस्याबारे दुई लाखभन्दा बढी प्रयोगकर्ताले गुनासो दर्ता गरेका थिए ।
समस्या मुख्य रूपमा अमेरिकालगायत केही देशमा देखिए पनि विश्वभरका प्रयोगकर्ताले छोटो समयका लागि सेवा प्रयोग गर्न नसक्ने अवस्था आएको थियो । भिडियो प्ले नहुने, एप तथा वेबसाइट लोड नहुने जस्ता समस्या देखिएको प्रयोगकर्ताहरूले बताएका थिए ।
करिब एक घण्टापछि सेवा क्रमशः सामान्य अवस्थामा फर्किएको र हाल पूर्ण रूपमा सञ्चालनमा रहेको जनाइएको छ । यद्यपि, सेवा अवरुद्ध हुनुको ठोस कारणबारे कम्पनीले विस्तृत जानकारी सार्वजनिक गरेको छैन ।
प्रतिक्रिया