काठमाडौं । मध्यपूर्वमा विकसित पछिल्लो सुरक्षा अवस्था र क्षेत्रीय तनावलाई ध्यानमा राख्दै इजरायलको तेल अविवस्थित नेपाली राजदूतावासले त्यहाँ बसोबास गर्दै आएका सम्पूर्ण नेपाली नागरिकलाई उच्च सतर्कता अपनाउन अपिल गरेको छ।
दूतावासले शनिबार जारी गरेको एड्भाइजरीमा क्षेत्रीय परिस्थितिलाई नजिकबाट अनुगमन गरिरहेको जनाउँदै सबै नेपालीलाई सुरक्षित रहन आग्रह गरेको हो। सूचनामा इजरायली सुरक्षा निकाय तथा ‘होम फ्रन्ट कमान्ड’ले जारी गरेका सुरक्षा निर्देशहरूको पूर्ण पालना गर्न विशेष अनुरोध गरिएको छ।
दूतावासले नेपालीहरूलाई सकेसम्म घरभित्रै बस्न, अनावश्यक आवतजावत नगर्न र आफू बसोबास गर्ने क्षेत्रमा रहेका नेपाली समुदायसँग नियमित सम्पर्कमा रहन सुझाव दिएको छ। सम्भावित आकस्मिक अवस्थालाई मध्यनजर गर्दै सुरक्षित स्थान वा तोकिएका बङ्कर (सेल्टर) नजिकै रहन पनि आग्रह गरिएको छ।
यस्तै, सम्बन्धित इजरायली निकायको पूर्वस्वीकृतिबिना कुनै पनि यात्रा नगर्न निर्देशन दिइएको छ। स्थानीय समाचार, आधिकारिक सूचना तथा आपतकालीन चेतावनीहरू नियमित रूपमा हेर्दै सही र आधिकारिक जानकारीका आधारमा मात्रै निर्णय लिन दूतावासले सचेत गराएको छ।
शनिबार इजरायल र अमेरिकाले संयुक्त रूपमा इरानमाथि आक्रमण गरेपछि उत्पन्न परिस्थितिको प्रभाव मध्यपूर्वका विभिन्न देशहरूमा समेत देखिन थालेको छ। त्यसै सन्दर्भमा दूतावासले नेपाली नागरिकको सुरक्षालाई प्राथमिकतामा राख्दै आवश्यक सतर्कता अपनाउन पुनः आग्रह गरेको छ।
प्रतिक्रिया