दाङ । मतदान सुरु भएको तीन घण्टाभन्दा बढी समय बितिसक्दा पनि दाङका दुई मतदान केन्द्रमा मत खस्न सकेको छैन । बबई गाउँपालिका-१ जिलास्थित जनता आधारभूत विद्यालय र वडा नम्बर ७ तल्लो मलैखोलास्थित देउती माध्यमिक विद्यालय मतदान केन्द्रमा अहिलेसम्म कुनै मत नखसेको हो ।
जनता आधारभूत विद्यालय, जिलाका मतदान अधिकृत चिरञ्जीवी खड्काका अनुसार मतदानका लागि सम्पूर्ण तयारी पूरा भइसकेको छ र कर्मचारीहरू केन्द्रमा उपस्थित छन् । तर मतदाता नआएका कारण मतदान प्रक्रिया अघि बढ्न सकेको छैन। उक्त केन्द्रमा ६८२ जना मतदाता रहेका छन् ।
यसैगरी वडा नम्बर ७ तल्लो मलैखोलास्थित देउती माविमा पनि मतदान हुन नसकेको मतदान अधिकृत टेकबहादुर केसीले जानकारी दिएका छन् ।
बबई गाउँपालिका-१ र ७ अन्तर्गत बाँके राष्ट्रिय निकुञ्जको मध्यवर्ती क्षेत्रमा बसोबास गर्ने स्थानीयवासीले बस्ती स्थानान्तरणको माग राख्दै निर्वाचन बहिष्कार गर्ने अडान लिएका छन् ।
प्रमुख जिल्ला अधिकारी विश्वप्रकाश अर्यालले आन्दोलनरत पक्षलाई निर्वाचनमा सहभागी गराउने प्रयास भइरहेको बताए पनि हालसम्म उनीहरू मतदान प्रक्रियामा सहभागी नभएको जानकारी दिए ।
आन्दोलनरत बाँके राष्ट्रिय निकुञ्ज पीडित दाङ मध्यवर्ती क्षेत्रका स्थानीयको बहिष्कारका कारण बबई-७ देउती मावि मलैखोला र बबई-१ जनता आधारभूत विद्यालय जिलास्थित मतदान केन्द्रमा मत खस्न नसकेको हो ।
प्रतिक्रिया