भैरहवा । रूपन्देहीका विभिन्न स्थानबाट प्रहरीले भन्सार छली गरी ल्याइएका करिब रु चार लाख ७३ हजार मूल्य बराबरका सामान बरामद गरेको छ । जिल्ला प्रहरी कार्यालय रूपन्देहीबाट खटिएको प्रहरी टोलीले जिल्लाका विभिन्न स्थानमा गरेको चेकजाँचका क्रममा अवैध रूपमा ल्याइएका खाद्यान्न, कपडा तथा पशुपन्छीजन्य सामग्री नियन्त्रणमा लिएको हो ।
जिल्ला प्रहरी कार्यालय रूपन्देहीका प्रमुख प्रहरी उपरीक्षक जनकबहादुर शाहीका अनुसार मायादेवी गाउँपालिका–७ गरकट्टीबाट चिनी १०० केजी र सुकेको खुर्सानी १० केजी बरामद गरेको छ । त्यसैगरी लुम्बिनी सांस्कृतिक नगरपालिका–१३ वडबलियाबाट थान कपडा, धोती, बालबालिकाका कपडा, टिसर्ट, टप्स, सेन्डो, झुल, टावेल तथा पेटिकोटलगायत विभिन्न किसिमका लत्ताकपडा बरामद गरिएको जिल्ला प्रहरी कार्यालय रूपन्देहीको सूचना शाखाले जनाएको छ ।
जिल्लाको सिमरा बजारबाट बेवारिसे अवस्थामा रहेको बैखी जातको माछा करिब १०० केजी बरामद गरिएको छ । रोहिणी गाउँपालिका–७ पोखरभिण्डीबाट जिउँदो बोइलर कुखुरा करिब १०० केजी तथा कोटहिमाइ गाउँपालिका–३ प्रसियाघाटबाट बोइलर कुखुरा ४० वटा (करिब ७० केजी) बरामद गरिएको प्रहरीले जनाएको छ ।
त्यसैगरी सिद्धार्थनगर नगरपालिका–६ गल्लामण्डी क्षेत्रबाट हरियो केराउ चार बोरा र हरियो केरा चार बोरा बरामद गरिएको छ । बरामद गरिएका सामान आवश्यक कारबाहीका लागि पशु क्वारेन्टाइन कार्यालय भैरहवा र भन्सार कार्यालय बेलहिया पठाइएको छ ।
भन्सार छली तथा सीमा क्षेत्रमा हुने अवैध क्रियाकलाप नियन्त्रणका लागि नियमित चेकजाँचलाई कडाइ गरिएको जिल्ला प्रहरी कार्यालय रूपन्देहीका प्रवक्ता प्रहरी नायब उपरीक्षक कृष्णकुमार चन्दले जानकारी दिए । रूपन्देही प्रहरीले पछिल्लो समयमा चोरी तस्करी नियन्त्रण अपराध नियन्त्रण र सीमा अपराध न्यूनीकरणका लागि जागरुकता देखाएको छ । जिल्लामा अहिले लागुऔषध सेवनकर्ता तथा ओसारपसार गर्न गर्नेहरूप्रति समेत प्रहरी अहिले निर्मम रूपमा प्रस्तुत भएको छ ।
प्रतिक्रिया