काठमाडौं । यही फागुन २१ गते सम्पन्न प्रतिनिधिसभा सदस्य निर्वाचनअन्तर्गत समानुपातिकतर्फको मतगणना अन्तिम चरणमा पुगेको छ ।
पछिल्लो मतपरिणामअनुसार प्रत्यक्षतर्फ १२५ सिट जितेको राष्ट्रिय स्वतन्त्र पार्टी (रास्वपा) समानुपातिकतर्फ पनि अग्रस्थानमा रहेको छ । रास्वपाले हालसम्म ५१ लाख ३५ हजार ६२१ मत प्राप्त गरेको छ भने अब केही मतगणना मात्र बाँकी रहेको जनाइएको छ ।
दोस्रो स्थानमा रहेको नेपाली कांग्रेसले १७ लाख ४७ हजार ७३७ मत प्राप्त गरेको छ । त्यसैगरी तेस्रो स्थानमा नेकपा (एमाले) ले १४ लाख ४८ हजार ३१८ मत पाएको छ भने चौथो स्थानमा रहेको नेपाल कम्युनिस्ट पार्टी (नेकपा) ले ८ लाख ३ हजार ६२७ मत प्राप्त गरेको छ ।
पाँचौँ स्थानमा रहेको श्रम संस्कृति पार्टीले ३ लाख ७८ हजार ५८७ मत प्राप्त गरेको छ । यस्तै छैटौँ स्थानमा रहेको राष्ट्रिय प्रजातन्त्र पार्टी (राप्रपा) ले ३ लाख २९ हजार ४५७ मत प्राप्त गर्दै थ्रेसहोल्ड कटाएको छ ।
समानुपातिकतर्फ हालसम्म कुल १ करोड ७ लाख ३० हजार ५५१ मतगणना भइसकेको छ । प्रत्यक्षतर्फको अन्तिम परिणाम भने सोमबार नै सार्वजनिक भइसकेको छ ।
यसअघि राष्ट्रिय दलको हैसियत पाएका तथा थ्रेसहोल्ड कटाएका मधेशकेन्द्रित दलहरू भने यसपटक निकै पछि परेका छन् । जनता समाजवादी पार्टी (जसपा) नेपालले १ लाख ७४ हजार ३०६ मत प्राप्त गरेको छ भने जनमत पार्टीले ७८ हजार ९४९ मत पाएको छ । जनमतभन्दा अगाडि रहेको राष्ट्रिय परिवर्तन पार्टीले १ लाख ७१ हजार ४९७ मत प्राप्त गरेको छ ।
प्रतिक्रिया