बुटवल । बुटवलमा सम्पन्न चौथो लुम्बिनी प्रदेशस्तरीय मेयर कप ब्याडमिन्टन प्रतियोगितामा दुई विधाको उपाधि आयोजक बुटवल ब्याडमिन्टन क्लबले जितेको छ । एक विधाको उपाधि भने लाफा समूहले हात पारेको छ ।
प्रतियोगिताको मेन्स डबलतर्फ बुटवल ब्याडमिन्टन क्लबका विवेक न्यौपाने र डेभिड थापा विजेता बने । ५५ वर्षमाथिको भेट्रान्स डबलतर्फ पनि बुटवल क्लबकै गोपाल टण्डन र नवराज श्रेष्ठले उपाधि जिते । यस्तै मास्टर भेट्रान्स डबलतर्फ लाफा समूहका प्रसाद गुरुङ र पुरन गाहा विजयी भए ।
मेन्स डबलतर्फ बुटवल क्लबका विश्वास नेपाल र गणेश रायमाझी उपविजेता बने भने लाफा समूहका विनोद पौडेल र अरबिन्द्र श्रीपाली तथा लाफाकै हिमान्सु कवर र सुविन श्रेष्ठ तेस्रो स्थानमा रहे ।
त्यस्तै ५५ वर्षमाथिको भेट्रान्स डबलतर्फ लाफा समूहका राजु गुरुङ र दिलिप श्रेष्ठ दोस्रो भए भने गुल्मीका निरबहादुर राना र खगेन्द्र रेग्मी तथा नेपालगञ्जका गणेश क्षेत्री र जगत श्रेष्ठ तेस्रो स्थानमा रहे ।
मास्टर भेट्रान्स डबलतर्फ बुटवल ब्याडमिन्टन क्लबका महेश्वर नेपाल र अशोक क्षेत्री दोस्रो भए भने तिलोत्तमा ब्याडमिन्टन क्लबका थमन सारु र सुरज गुरुङ तथा बुटवल क्लबकै नारायण तिवारी र बालदर गोदार तेस्रो स्थानमा रहेका अम्पायर अर्जुन कार्कीले जानकारी दिए ।
प्रतियोगितामा उत्कृष्ट खेलाडी बुटवल ब्याडमिन्टन क्लबका विवेक न्यौपाने घोषित भए । विजेता तथा उपविजेता खेलाडीलाई बुटवल उपमहानगरपालिकाका नगर प्रमुख खेलराज पाण्डेले नगद पुरस्कार, मेडल र ट्रफी प्रदान गरेका थिए ।
मेन्स डबलतर्फ प्रथम हुने टोलीले ५१ हजार रुपैयाँ, दोस्रो हुने टोलीले ४१ हजार रुपैयाँ र तेस्रो हुने टोलीले ३१ हजार रुपैयाँसहित कप, मेडल र प्रमाणपत्र प्राप्त गरेका छन् ।
यसैगरी ५५ वर्षमाथिको भेट्रान्स डबलतर्फ प्रथम हुने टोलीले २० हजार रुपैयाँ, दोस्रो हुने टोलीले १५ हजार रुपैयाँ र तेस्रो हुने टोलीले १० हजार रुपैयाँसहित कप, मेडल र ट्रफी प्राप्त गरेका छन् ।
त्यस्तै मास्टर भेट्रान्स डबलतर्फ प्रथम हुने टोलीले ३० हजार रुपैयाँ, दोस्रो हुने टोलीले २५ हजार रुपैयाँ र तेस्रो हुने टोलीले २० हजार रुपैयाँ पुरस्कार प्राप्त गरेका छन् ।
बुटवल ब्याडमिन्टन क्लबका अध्यक्ष नलराज नेपालको अध्यक्षतामा सम्पन्न कार्यक्रममा क्लबका वरिष्ठ उपाध्यक्ष शम्भु भट्टराई कार्यक्रम संयोजक तथा तृतीय उपाध्यक्ष भानु केसी, सचिव राजु खरेललगायतले प्रतियोगिताबारे जानकारी गराएका थिए ।
प्रतिक्रिया