काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने विरुद्धको सम्पत्ति शुद्धीकरण तथा संगठित अपराधसम्बन्धी मुद्दाको अभियोग फिर्ता लिने महान्यायाधिवक्ता कार्यालयको निर्णयविरुद्ध दायर रिट निवेदनमा आज पनि सुनुवाइ हुँदैछ । सर्वोच्च अदालतका न्यायाधीशद्वय विनोद शर्मा र अब्दुल अजीज मुसलमानको संयुक्त इजलासमा सोमबार सुनुवाइ नसकिएपछि मुद्दालाई ‘हेर्दाहेर्दै’मा राख्दै आजका लागि पुनः पेश गरिएको हो ।
यसअघि फागुन २७ गते न्यायाधीशद्वय सपना प्रधान मल्ल र श्रीकान्त पौडेलको इजलासले उक्त रिटलाई पूर्ण सुनुवाइका लागि पेश गर्न आदेश दिएको थियो । त्यसयता यो मुद्दा पाँचौँपटक ‘हेर्दाहेर्दै’मा परेको छ । महान्यायाधिवक्ता कार्यालयले लामिछाने तथा फरार अभियुक्त जीबी राईविरुद्ध विभिन्न जिल्ला अदालतमा विचाराधीन संगठित अपराध र सम्पत्ति शुद्धीकरणसम्बन्धी मुद्दा फिर्ता लिने निर्णय गरेको थियो । सो निर्णयविरुद्ध वरिष्ठ अधिवक्ता दिनेश त्रिपाठी, अधिवक्ता युवराज पौडेल र आभास रेग्मीले सर्वोच्च अदालतमा छुट्टाछुट्टै रिट निवेदन दायर गरेका हुन् ।
महान्यायाधिवक्ता कार्यालयले लामिछानेलाई सहकारी ठगीसम्बन्धी मुद्दामा मात्र अभियोजन गर्ने र अन्य दुई गम्भीर प्रकृतिका मुद्दा हटाउन सम्बन्धित जिल्ला सरकारी वकिल कार्यालयहरूलाई निर्देशन दिएको थियो ।
प्रतिक्रिया