काठमाडौं । नेपाल कम्युनिष्ट पार्टी (एमाले) ले पार्टी अध्यक्ष केपी शर्मा ओलीको रिहाइको माग गर्दै आज देशभरका ७७ वटै जिल्ला प्रशासन कार्यालयमा ज्ञापनपत्र बुझाउने भएको छ ।
गौरीबहादुर कार्की नेतृत्वको छानबिन आयोगले दोषी ठहर गरेको आधारमा ओलीलाई निवासबाटै प्रहरीले पक्राउ गरेपछि बसेको एमाले सचिवालय बैठकले उक्त कदमको विरोध गर्दै रिहाइको मागसहित ज्ञापनपत्र बुझाउने निर्णय गरेको हो ।
एमाले प्रचार तथा प्रकाशन विभागका संयोजक मीन बहादुर शाहीका अनुसार काठमाडौंमा माइतीघर मण्डलमा भेला भएर नारा-जुलुससहित जिल्ला प्रशासन कार्यालयसम्म मार्च गर्दै ज्ञापनपत्र बुझाइने तयारी गरिएको छ ।
यसअघि शनिबार पार्टी सम्बद्ध जनसंगठनहरूले माइतीघरदेखि बानेश्वरसम्म विरोध प्रदर्शन गरेका थिए ।
त्यसैगरी अध्यक्ष ओली पक्राउ प्रकरणबारे आज बिहान १०:३० बजे कानुनविदहरूसँग अन्तरसंवाद कार्यक्रम पनि आयोजना गरिने भएको छ । उक्त कार्यक्रम पुतलीसडक स्थित संगठनको केन्द्रीय कार्यालयमा हुने जनाइएको छ ।
ओली पक्राउपछि एमालेले आन्दोलनका कार्यक्रमहरू थप तीव्र बनाउँदै गएको छ ।
प्रतिक्रिया