काठमाडौं । ‘सानुभाइ’ भनेर चिनिने युवराज गुरुङसहित १८ जनालाई प्रहरीले पक्राउ गरेको छ । जिल्ला प्रहरी परिसर काठमाडौंका एसएसपी रमेश थापाका अनुसार गुरुङलाई गएराति सामाखुसी क्षेत्रबाट नियन्त्रणमा लिइएको हो ।
प्रहरीले शुक्रबार रातिदेखि काठमाडौं उपत्यकामा गुण्डागर्दी नियन्त्रण गर्न विशेष अपरेशन सञ्चालन गरेको थियो । उक्त अपरेशनका क्रममा सानुभाइसहित १८ जनालाई पक्राउ गरी अनुसन्धान अघि बढाइएको प्रहरीले जनाएको छ ।
नुवाकोटको ककनी गाउँपालिका-५ घर भई हाल टोखास्थित सूर्यदर्शन हाइटमा बस्दै आएका ३३ वर्षीय गुरुङ यसअघि पनि पटक-पटक पक्राउ परेर छुट्दै आएका थिए । उनी अहिले आठौँ पटक पक्राउ परेका हुन् ।
प्रहरीका अनुसार गुरुङ कुख्यात गुण्डा नाइके कुमार घैंटेका निकट सहयोगी हुन् । घैंटे प्रहरी इन्काउन्टरमा मारिएपछि गुरुङ बुलेटप्रुफ ज्याकेट लगाएर हिँड्ने गरेको उल्लेख छ ।
यसअघि २०७२ पुसमा नुवाकोटबाट हतियारसहित पक्राउ पर्दा उनी बुलेटप्रुफ ज्याकेटसहित फेला परेका थिए । त्यतिबेला उनीविरुद्ध हातहतियार तथा खरखजाना मुद्दामा अनुसन्धान गरिएको थियो ।
प्रहरीले पक्राउ परेका सबै व्यक्तिमाथि संगठित अपराध तथा सार्वजनिक शान्ति भंगसम्बन्धी कसुरमा थप अनुसन्धान गरिरहेको जनाएको छ ।
प्रतिक्रिया