एजेन्सी । अमेरिका र इरानबीच दुई हप्ते युद्धविरामको सहमति भएको खबर सार्वजनिक भइरहँदा खाडी क्षेत्रका मुलुकहरूमा भने आक्रमणको सिलसिला रोकिएको छैन । संयुक्त अरब इमिरेट्सको रक्षा मन्त्रालयले इरानबाट मिसाइल र ड्रोन आक्रमण भइरहेको पुष्टि गरेको छ ।
मन्त्रालयका अनुसार यूएईको हवाई रक्षा प्रणालीले आक्रमणलाई बीचमै नष्ट गर्ने प्रयास गरिरहेको छ । राजनीतिक तहमा युद्धविरामको सहमति भए पनि व्यवहारमा अमेरिकी सहयोगी राष्ट्रहरू अझै निशानामा परिरहेको देखिएको छ ।
यसैबीच साउदी अरबले आफ्नो पूर्वी क्षेत्र तथा राजधानी रियादमा आपत्कालीन अलर्ट जारी गरेको छ । साउदी सरकारले सम्भावित खतराबारे सचेत गराउँदै नागरिकहरूलाई सुरक्षित स्थानमा बस्न आग्रह गरेको छ ।
इरान–अमेरिका तनाव चर्किँदै जाँदा खाडी क्षेत्रका अन्य देशहरूमा पनि यसको प्रत्यक्ष असर देखिएको छ । युद्धविरामको प्रस्ताव आए पनि प्रारम्भिक चरणमै देखिएको हिंसाले शान्ति प्रक्रियामाथि थप अनिश्चितता सिर्जना गरेको छ ।
डोनाल्ड ट्रम्पले इरानले स्ट्रेट अफ हर्मुजबाट जहाज आवागमन सुचारु गरे दुई हप्ते युद्धविराम गर्न तयार रहेको बताएका छन् । अर्कोतर्फ सैयद अब्बास अरागाचीले इरानमाथिका आक्रमण पूर्ण रूपमा रोकिएपछि मात्रै युद्ध अन्त्य गर्न सकिने सर्त अघि सारेका छन् ।
यसै क्रममा पाकिस्तानले मध्यस्थकर्ताको भूमिका निभाउँदै दुवै पक्षलाई वार्ताका लागि आगामी शुक्रबार इस्लामाबादमा निम्तो दिएको छ ।
प्रतिक्रिया