काठमाडौं । अमेरिका र इरानबीच इस्लामाबादमा औपचारिक वार्ता हुने भएको छ । इरानको राष्ट्रिय सुरक्षा परिषद्का अनुसार उक्त वार्ता तेहरानले अघि सारेको १० बुँदे प्रस्तावमा आधारित हुनेछ ।
इरानले प्रस्तुत गरेको प्रस्तावमा होर्मुज जलडमरुमा आफ्नो नियन्त्रण कायम रहने तथा इरानमाथि लगाइएका सबै प्रतिबन्ध हटाइनुपर्ने मुख्य माग समावेश छन् । दुई साताको युद्धविराममा सहमति भएसँगै दुवै पक्ष शुक्रबार वार्तामा बस्न सहमत भएका हुन् ।
बुधबार जारी विज्ञप्तिअनुसार डोनाल्ड ट्रम्पले इरानका पूर्वाधारमा आक्रमण गर्ने चेतावनी फिर्ता लिँदै दुई सातासम्म आक्रमण स्थगित गर्न सहमति जनाएका छन् । उनले होर्मुज जलडमरु पूर्ण रूपमा सुरक्षित र खुला राख्ने सर्तमा मात्रै युद्धविराम कार्यान्वयन हुने स्पष्ट पारेका छन् ।
गत फेब्रुअरी २८ मा इजरायल र अमेरिकाले गरेको आक्रमणको प्रत्युत्तरमा इरानले उक्त जलमार्गमा आंशिक नाकाबन्दी लगाएको थियो । यसका कारण विश्व बजारमा इन्धन अभाव हुनुका साथै तेलको मूल्यमा उल्लेख्य वृद्धि भएको थियो । इरानको कदमपछि हिजबुल्लाह र हुथी विद्रोहीसमेत द्वन्द्वमा सक्रिय भएपछि क्षेत्रीय तनाव थप चर्किएको छ ।
राष्ट्रपति ट्रम्पले आफ्नो सामाजिक सञ्जाल ‘ट्रुथ सोसल’मार्फत इरानको १० बुँदे प्रस्तावलाई वार्ताका लागि “व्यवहारिक आधार” भन्दै अधिकांश विवादित विषयमा सहमति नजिक पुगेको दाबी गरेका छन् । उनले आगामी दुई साताभित्र सम्झौतालाई अन्तिम रूप दिने विश्वास व्यक्त गरेका छन् ।
यसैबीच अब्बास अराघचीले इरान तत्कालका लागि युद्धविराम कायम राख्दै कूटनीतिक संवादमा सहभागी हुन तयार रहेको बताएका छन् ।
प्रतिक्रिया