काठमाडौं । समाज कल्याण परिषद्ले भृकुटीमण्डपभित्र कार्यालय तथा व्यवसाय सञ्चालन गरेर भाडा नतिर्नेविरुद्ध कारबाही सुरु गरेको छ ।
परिषद्ले लामो समयदेखि बक्यौता बाँकी रहेका विभिन्न संरचनामा तालाबन्दी गरेको हो । भाडा बुझाउन पटक-पटक सूचना जारी गर्दा पनि अटेर गरेपछि यस्तो कदम चालिएको परिषद्ले जनाएको छ ।
परिषद्का सदस्य सचिव सरोजकुमार शर्माका अनुसार रिपोर्टर्स क्लब नेपाल, काठमाडौं उपत्यका सार्वजनिक पुस्तकालय, फोटो पत्रकार महासंघ र अपाङ्ग महासंघ लगायत २० वटा संरचनामा ताला लगाइएको छ ।
उनका अनुसार हाल १० करोड रुपैयाँभन्दा बढी भाडा उठ्न बाँकी रहेको छ । परिषद्ले ताला लगाइएका संस्थाहरूलाई सात दिनभित्र बक्यौता बुझाउन निर्देशन दिएको छ ।
सदस्य सचिव शर्माले अब भृकुटीमण्डप क्षेत्रभित्रका संरचनालाई व्यवस्थित बनाउने तयारी भइरहेको जानकारी दिए । महिला, बालबालिका तथा ज्येष्ठ नागरिक मन्त्री सीता बादीको निर्देशनमा परिषद्ले भाडा असुलीमा कडाइ गरेको हो ।
प्रतिक्रिया