वीरगञ्ज । वीरगञ्जमा त्रिभुवन राजपथ अन्तर्गतको मुख्य सडक (मेनरोड) विस्तार कार्य आइतबार बिहानैदेखि सुरु गरिएको छ।
गण्डक चोकदेखि भारत सीमास्थित मितेरी पुलसम्मको सडक खण्ड विस्तारका लागि बिहान साढे ४ बजेदेखि सडक क्षेत्र अतिक्रमण गरेर बनाइएका घर तथा संरचनाहरूमा डोजर चलाइएको हो।
सडक डिभिजन कार्यालय हेटौंडाको समन्वयमा सञ्चालन गरिएको अभियानमा ९ वटा हेभी उपकरण र वीरगञ्ज महानगरपालिकाका ४ वटा डोजर परिचालन गरिएको छ। मुख्य सडकको केन्द्रबाट दायाँ–बायाँ २५–२५ मिटरभित्र पर्ने सबै संरचना हटाइने जनाइएको छ।
जिल्ला प्रशासन कार्यालय पर्साले पूर्वसूचना जारी गर्दै सम्बन्धित पक्षलाई समयमै संरचना खाली गर्न निर्देशन दिएको थियो। कतिपय व्यापारीहरूले अग्रिम रूपमा सामान हटाउँदै सेलसमेत लगाएका थिए।
सर्वोच्च अदालतले २०८१ फागुन २८ गते मेनरोड विस्तारविरुद्ध परेको रिट खारेज गरेपछि लामो समयदेखि अवरुद्ध रहेको यो परियोजना अघि बढेको हो। करिब १३ वर्षदेखि विभिन्न अवरोधका कारण रोकिएको सडक विस्तार अब कार्यान्वयनमा गएको हो।
प्रमुख जिल्ला अधिकारी भोला दाहालका अनुसार सुरक्षा निकाय, महानगरपालिका र सरोकारवाला पक्षसँग समन्वय गरेर अभियान अघि बढाइएको छ। महानगर प्रमुख राजेशमान सिंहले अदालतको आदेशअनुसार सडक अतिक्रमण हटाउने कार्यलाई तीव्रता दिइएको बताएका छन्।
प्रतिक्रिया