काठमाडौं । नेपाली कांग्रेसका सभापति गगन कुमार थापा कोशी प्रदेशस्तरीय निर्वाचन समीक्षा कार्यक्रममा सहभागी हुन आज विराटनगर जाने भएका छन् ।
निर्धारित कार्यतालिका अनुसार सभापति थापा बिहान ९ः५० बजे विराटनगर विमानस्थलमा अवतरण गर्नेछन् भने बिहान १०ः३० बजेदेखि समीक्षा कार्यक्रम सुरु हुने सहमहामन्त्री डा. डिला संग्रौलाले जानकारी दिइन् ।
प्रदेशस्तरमा संगठन सुदृढीकरण, निर्वाचन परिणामको समीक्षा तथा आगामी रणनीति तय गर्ने उद्देश्यले कार्यक्रम आयोजना गरिएको हो । कार्यक्रममा केन्द्रीय पदाधिकारी, केन्द्रीय सदस्य, प्रदेश कार्यसमिति, संघीय तथा प्रदेश सांसद, जिल्ला र क्षेत्रीय सभापतिहरू तथा अघिल्लो निर्वाचनका उम्मेदवारहरूको सहभागिता रहनेछ ।
कांग्रेसले पछिल्लो समय विभिन्न प्रदेशमा समीक्षा कार्यक्रम सञ्चालन गर्दै आएको छ । यसअघि गण्डकी, लुम्बिनी, बागमती र मधेश प्रदेशमा यस्ता कार्यक्रम सम्पन्न भइसकेका छन् भने आज कोशी प्रदेशमा छलफललाई निरन्तरता दिन लागिएको हो ।
समीक्षा कार्यक्रममार्फत स्थानीय तहदेखि प्रदेश तहसम्मको संगठनात्मक अवस्था, चुनावी नतिजा, कमजोरी र सुधारका सम्भावनाबारे सुझाव संकलन गरिने अपेक्षा गरिएको छ । साथै आगामी राजनीतिक रणनीति, संगठन विस्तार, क्रियाशील सदस्यता र १५औँ महाधिवेशनको तयारीका विषयमा पनि छलफल हुने जनाइएको छ ।
प्रतिक्रिया